Cəfər Cabbarlının dəfnindən "FOTOREPORTAJ"

1935-ci ilin 1 yanvarı... Bakılılar yeni ili çox ağır bir xəbərlə qarşıladılar; ötən il son gecəsində Azərbaycan ədəbiyyat və mədəniyyətinin böyük siması Cəfər Cabbarlı dünyasını dəyişmişdi. Çox yox, cəmi 35 il ömür sürməsinə baxmayaraq, hamı ona az qala, bir ağsaqqal, nüfuzlu ziyalı kimi hörmət edirdi.
O, gördüyü bütün işlər, yazdığı bütün əsərlərlə həmin nüfuza çoxdan sahiblənmişdi. Gah şeir, gah hekayə, gah publisistik məqalə yazdığı ədəbiyyatla kifayətlənməyib, teatr sənətinə baş vurdu. Bu sahənin ən güclü əsərlərini yaratdı. Daha sonra isə yeni cücərməkdə olan kinonun inkişafı üçün tər tökdü. Min bir zülm, əziyyətlə üzləşdi. Bəzi filmləri özü çəkdi. İlk dəfə olaraq, kinoya qadın aktrisanı cəlb etdi.
Bir yandan da mətbuat və ictimai –siyasi həyat.... “Müsavat”ın gizli təşkilatı... Bağ evində keçirilən görüşlər... Təqib qorxusu... Bütün bunlar 35 illik ömrünə necə sığmışdı?!
...Və... həmin gün bütün Bakı onu son mənzilə yola salırdı; Elə Cabbarlısayaq...

Moderator.az C. Cabbarlının dəfni ilə bağlı iki tarixi faktlardan iki sitatı təqdim edir:

31 dekabr 1934-cü ildə verilmiş 1320 saylı qərarda yazılır:
“Talantlı Şura dramaturqu Cəfər Cabbarlı yoldaşın vəfatı ilə əlaqədar olaraq ASŞC Xalq Komissarları Şurası qərara alır:
1. Cəfər Cabbarlı yoldaşın dəfn edilməsi dövlət hesabına qəbul edilsin;
2. Cəfər Cabbarlı yoldaşın ailəsinə ayda 500 manat miqdarında şəxsi pensiya təyin edilsin;
3. Cəfər Cabbarlı yoldaşın ailəsinə 5000 manat miqdarında birdəfəlik təxsisat verilsin;
4. Dəfni keçirmək və Cəfər Cabbarlı yoldaşın xatirəsini əbədiləşdirmək tədbirlərini görmək üçün Şəmsəddinski yoldaşın sədarəti altında Ələkbərli, Talıblı, M.Kələntərov, B.Rzayev, Nəzərli, Triniç, Lukiçev, Mkrtçyan və şura yazıçısı Qantəmir yoldaşdan ibarət hökumət komissiyası təşkil edilsin.
ASŞC Xalq Komissarlar Şurası sədri: H.Rəhmanov
ASŞC Xalq Komissarlar Şurası işlər müdiri: D.Arutunov”

2.Cabbarlının həyat yoldaşı Sona xanıma verilən başsağlığı mətni:
“Sona Cabbarlıya.
Sizinlə birlikdə Şuralar Azərbaycanının sevimli yazıçısı, Zaqafqaziyanın böyük dramaturqu Cəfər Cabbarlını, təvazökar və sosializm quruluşu işinə sadiq adamı itirdiyimizə kədərlənirik. Onun xatirəsi, onun talantlı yaradıcılığı ilə birlikdə nəsildən-nəsilə yaşayacaqdır.
M.C.Bağırov

C.Cabbarlının dəfnindən "fotoreportaj"ı təqdim edirik. Qeyd edək ki, Cəfər Cabbarlı dəfni lentin yaddaşına köçürülən ilk ziyalımızdır.

Zamantv.az