Bakıda evdən meyit tapılıb.

Fövqəladə Hallar Nazirliyindən Zamantv.az-a verilən məlumata görə, paytaxtın Yasamal rayonunda 1 nəfər mənzildə bağlı qapı arxasında köməksiz vəziyyətdə qalıb. Hadisə yerinə cəlb olunan FHN-nin Xüsusi Riskli Xilasetmə Xidmətinin müvafiq xilasetmə qüvvələri mənzilin giriş qapısını açıb və orada aşkarlanan 82 yaşlı Mahmudova Qızbikə Mahmud qızının meyitini aidiyyəti üzrə təhvil veriblər.

Bakıda qətl hadisəsi törədilib.

"Zamantv.az" xəbər verir ki, hadisə Nərimanov rayonunda qeydə alınıb. Təbriz küçəsində kütləvi dava zamanı 1993-cü il təvəllüdlü Alirzayev Fərid Adil oğlu ürəyindən bıçaqlanaraq qətlə yetirilib.

Hadisənin təfərrüatı Nərimanov rayon Prokurorluğunda araşdırılır.(report.az)

Bakıda yanğın olub.

"Zamantv.az" Fövqəladə Hallar Nazirliyinin saytına istinadən xəbər verir ki, Bakı şəhərinin Xətai rayonunda ümumi sahəsi 400 m² olan birmərtəbəli evin dam örtüyünün yanar konstruksiyaları 200 m² sahədə yanıb. Evin qalan hissəsi yanğından mühafizə olunub. Yanğın yanğından mühafizə bölmələri tərəfindən söndürülüb.

Moskva Apellyasiya Məhkəməsi 55 yaşlı “qanuni oğru” Sumbat Abbasovun apellyasiya şikayətini təmin etməyib.

Zamantv.az Rusiya KİV-ə istinadla bildirir ki, Abbasov 2020-ci ilin sonunda Ukrayna sərhədini qeyri-qanuni keçməkdə günahkar bilinir.

Bundan başqa o, cinayətkar qruplaşma yaratmaqda ittiham olunur.
Kriminal aləmdə “Sumbat Tbilisiski” kimi tanınan “qanuni oğru” milliyətcə yezidi kürddür.

Qeyd edək ki, məlumata görə, o, cəza çəkdiyi həbsxananın yandırılmasının qarşısını alıb. Həbsxanada baş verən qanunsuzluqlara qarşı etiraz edən gənc dustaqlar yanğın törətmək istəsə də, onların qarşısına çıxan Abbasov buna imkan verməyib.

İmişlidə kişi uçqunun altında qalaraq ölüb.

Fövqəladə Hallar Nazirliyindən Zamantv.az-a verilən məlumata görə, rayonun Cəfərli kəndində beton hasarın uçması nəticəsində uçqun altında qalan 38 yaşlı Xələfov Maqsud İlham oğlunun meyitinin çıxarılması üçün müraciət daxil olub. Müraciətlə əlaqədar FHN-nin Dövlət Yanğından Mühafizə Xidmətinin müvafiq xilasetmə qüvvələri hadisə yerinə cəlb olunub.

Keçirilən tədbirlər nəticəsində M.Xələfovun meyiti beton plitənin altından çıxarılaraq aidiyyəti üzrə təhvil verilib.

Bu gün Qusarda baş verən ailə faciəsi ilə bağlı xəbər vermişdik.

Zamantv.az-ın məlumatına görə, Qusar şəhəri, H.Əliyev küçəsində yerləşən çoxmənzilli yaşayış binasında mənzillərdən birində 1987-ci il təvəllüdlü Rusif Şıxov, arvadı 1993-cü il təvəllüdlü Əminə Şıxova və onların 3 azyaşlı uşaqlarının meyitləri aşkar edilib. Onların dəm qazından boğulduğu bildirilir.

Həmin hadisədən bir saat sonra Bakı-Quba avtomobil yolunun Sumqayıtdan keçən hissəsində 3 nəfərin ölümü ilə nəticələnən yol qəzası baş verib. Belə ki, "Mercedes" markalı avtomobil körpüdən aşıb. Qəza nəticəsində bir ailənin 3 üzvü - sürücü 34 yaşlı Əliyev Seymur Fikrət oğlu, həyat yoldaşı 23 yaşlı Ələkbərova Fidan Mövsüm qızı və onların bir yaşlı övladları Həmzə hadisə yerində ölüblər.
Sosial şəbəkələrdə yayılan məlumata görə, hər iki ailə faciəsi bir-biri ilə əlaqəli olub. Belə ki, yol qəzasında həyatını itirən Fidan Ələkbərovanın Qusarda dəm qazından boğularaq ölən Əminənin bacısı olduğu bildirilir. Fidan ailəsi ilə birlikdə Qusara bacısının yasına gedirmiş

Göygöldə qonşusunu bıçaqlayan şəxsin kimliyi məlum olub. Lent.az-ın APA-ya istinadla məlumatına görə, təqsirləndirilən şəxs 1993-cü il təvəllüdlü Muradov Xəyyam Alagöz oğludur. Onun saxlanılması istiqamətində axtarışlar davam edir.
Göygöldə bıçaqlanma hadisəsi baş verib.

Zamantv.az-ın APA-ya istinadla məlumatına görə, hadisə rayonun Topalhəsənli kəndində qeydə alınıb.

Kənd sakini 1985-ci il təvəllüdlü Mübariz Yusibov ayaq budunun yuxarı iç səhtin 3 ədəd kəsilmiş-deşilmiş bıçaq yarası ilə xəstəxanaya yerləşdirilib. Xəstənin yarası tikilib, vəziyyətinin kafi olduğu bildirilir. Məlumata görə M.Yusibov qonşusu tərəfindən bıçaqlanıb. Faktla bağlı araşdırma aparılır.

Gəncə şəhər Baş Polis İdarəsinin Narkotiklərlə Mübarizə Bölməsinin əməkdaşlarının keçirdikləri əməliyyat-axtarış tədbirləri nəticəsində xaricdən qeyri-qanuni yolla ölkə ərazisinə gətirilmiş narkotik vasitəni onlayn yolla sifariş kimi qəbul edərək ölkə ərazisində çatdırılmasını təmin edən narkokuryer saxlanılıb.

Zamantv.az-ın xəbərinə görə, araşdırmalar zamanı məlum olub ki, taksi fəaliyyəti ilə məşğul olan, Gəncə şəhər sakini Anar Qarayev sosial şəbəkələr üzərindən əcnəbi vətəndaşdan Bakı şəhəri ərazisində gizlədilən narkotik vasitəni 300 manat qarşılığında Gəncə şəhərinə gətirməyə razılaşıblar. Həmin şəxs Gəncə şəhərində saxlanılaraq Baş Polis İdarəsinə gətirilən zaman avtomobildən çəkisi 203 qram olan “heroin” aşkar olunaraq götürülüb.

Bakıda yollardakı dəmir barmaqlıqlar oğurlanıb.

Daxili İşlər Nazirliyindən Zamantv.az-a verilən məlumata görə, paytaxtın Binəqədi və Bakı şəhərinin müxtəlif rayonlarında avtomobil yollarında quraşdırılan su ötürücü avadanlıqların dəmir barmaqlıqları naməlum şəraitdə oğurlanıb.

Binəqədi rayon Polis İdarəsinin Cinayət Axtarışı Şöbəsinin əməkdaşlarının keçirdikləri əməliyyat-axtarış tədbiri nəticəsində həmin hadisələri törətməkdə şübhəli bilinən Təvəkkül Nuriyev və Seymur Əhmədov saxlanılıblar. Araşdırmalar zamanı həmin şəxslərin paytaxt ərazisindəki yollarda 26 su ötürücü qurğusunun dəmir barmaqlığını oğurladıqları müəyyən edilib.
Saxlanılan zaman onlardan şəxsi istifadələri üçün əldə etdikləri narkotik vasitələr də aşkar edilib.

Faktlarla bağlı Binəqədi rayon Polis İdarəsində Cinayət İşi başlanılıb. Təvəkkül Nuriyev və Seymur Əhmədov barəsində məhkəmənin qərarı ilə 3 ay müddətinə həbs-qətimkan tədbiri seçilib.

Bakının Nərimanov rayonunda kütləvi dava zamanı iki nəfər bıçaqla qətlə yetirilib.

Zamantv.az APA-ya istinadla xəbər verir ki, hadisə Təbriz küçəsində qeydə alınıb. Əlirzayev Fərid Adil oğlu və Şahin Qurbanov ürəyindən bıçaqlanaraq qətlə yetirilib.

Faktla bağlı Nərimanov Rayon Prokurorluğunda cinayət işi başlanılıb. Hadisə ilə bağlı bir nəfər saxlanılıb.