Köçəryanın vəkili işğal edilmiş ərazilərin bir qisminin Dağlıq Qarabağa aid olmadığını dedi - VƏ HAY KÜY QALXDI...

Ermənistanda konstutusiya quruluşunu zorla dəyişdirməkdə ittiham olunan keçmiş prezident Robert Köçəryanın vəkili Ovanes Xudoyan Dağlıq Qarabağ ətrafındakı işğal edilmi ərazilərin bir hissəsinin “Dağlıq Qarabağa aid olmadığını” deyib. Virtualaz.org xəbər verir ki, vəkilin bu sözləri ətrafında hay-küy qalxıb, onu az qala xəyanətdə ittiham etməyə başlayıblar.

“Azadlıq” radiosunun erməni xidmətinin bildirdiyinə görə, qondarma “dqr prezidenti aparatının rəhbəri” David Babayan “artsax konstitusiyasına əsasən” bütün işğal edilmiş ərazilərin “dqr”ə aid olduğunu deyib. Onun sözlərinə görə, hər bir patriot hesab edir ki, keçmişə qayıtmaq mümkün olmayacaq, o cümlədən sərhədlər məsələsində.


Vəkil Ovanes Xudoyan həmin fikirləri Ermənistanın İctimai Televizyasına açıqlamasında 2008-ci il 1 mart hadisələri zamanı Dağlıq Qarabağdan Yerevana hərbi birləşmələrin yeridilməsi barədə danışarkən işlədib. Deyib ki, tanınmasndan, yaxud tanınmamasından asılı olmayaraq Dağlıq Qarabağ “müstəqil dövlət vahididir” və özünün silahlı qüvvələri var. Və həmin silahlı qüvvələrin tərkibindən bir nəfər də olsun hərbçi Ermənistana gətirilməyib.

Bu zaman jurnalist vəkildən soruşub: “Bəyəm siz zəbt olunmuş əraziləri də Qarabağın tərkib hissəsi hesab etmirsiniz?”

“Həmin ərazilərin bir hissəsi Dağlıq Qarabağ respublikasının ərazisi hesab edilə bilməz”,-vəkil belə cavab verib.

Köçəryan Azərbaycan ərazilərinin işğalına başçılıq edən biri kimi “Qarabağ qəhrəmanı”dır və onun vəkilinin işlətdiyi sözlər qondarma rejimin rəhbərliyini məmun etməyib.Amma Babayan deyib ki, onlar bu mövzu ətrafında spekulyasiya etmək istəmirlər. Çünki “konstitusiyada” bütün zəbt edilmiş ərazilərin “Dağlıq Qarabağ respublikası”na aid olduğu göstərilib.

Köçəryanı dəstəkləyən Daşnaksütun partiyası isə məsələni şərh etmək istəməyb. Hakim “Mənim addımım” fraksiyasından deputat Vahan Tevosyan isə vəkilin “təsadüfən belə fikirlər işlətdiyinə” ümid etdiyini bildirib.

Vəkil Xudoyan isə daha sonra Facebook-da izahatla çıxış edərək fikirlərinin yanlış yozulduğunu bildirib.

Lakin bu polemika, hay-küy ondan xəbər verir ki, Ermənistan rəhbərliyi, siyasi dairələri işğal edilmiş ərazilərin ümumiyyətlə geri qaytarılmaması xəttini tutub. Və “bir qarış da olsun torpaq qaytarmamaq” artıq Yerevanın Qarabağ məsələsindəki mövqeyi hesab edilə bilər. Hansı ki, bunu Ermənistanın baş naziri Nikol Paşinyanın Xankəndində verdiyi son bəyanatlar, Qarabağı Ermənistanın tərkib hissəsi elan etməsi, ətraf rayonlarda qanunsuz məskunlaşdırma üçün yeni yolların, suvarma sistemlərinin çəkilməsi də təsdiqləyir. O zaman “bir qarış da torpaq qaytarmaq istəməyən” düşmənlə danışıqlar masası arxasında nədən danışasan?! //Virtualaz.org//

Zamantv.az