İki bələdiyyədən 1-ci Vitse-prezidentə şikayət - Müraciət

Mayın 21-də Birinci vitse-prezident Mehriban xanım Əliyeva Kürdəxanı qəsəbəsində sakinlərlə görüşərkən xanımın diqqətinə qəsəbənin məktəbinin və yolunun təmiri, bir də kanalizasiya sisteminin çəkilməsinin vacibliyi çatdırılıb.

Mehriban xanım Əliyevanın müvafiq göstəriş və tapşırığından sonra qəsəbə məktəbinin əsaslı təmirinə başlanılıb. Kanalizasiya sistemi isə 2020-ci ildə Pirşağıda su təmizləyici qurğularının inşasının başa çatmasında sonra çəkiləcək. Bununla yanaşı, qəsəbənin yollarına asfalt çəkilir. Qəsəbədə sakinləri yerli məmurlardan narazı salan bir problem var və hələ ki, bu bir neçə gündür ki, sakinlərinə müraciətinə baxmayaraq həllini tapmır.

Qəsəbənin yollarının asfaltlanması zamanı yol yarımçıq təmir olunur. Sakinlər əməkdaşımıza bildiriblər ki, Kürdəxanı qəsəbəsinin Yeni yaşayış massivi adlanan ərazinin yolu təmir edilmir. Bu isə təbii ki, sakinlərin haqlı narazılığına səbəb olub. Məsələylə bağlı sakinlər Kürdəxanı bələdiyyəsinin sədri Pərviz Dadaşovun qəbulunda olublar. Onlar deyirlər ki, P.Dadaşov deyib ki, adı çəkilən Yeni yaşayış massivi Məmmədli bələdiyyəsinin tabeçiliyində olduğu üçün yolları təmir edilməyəcək və bununla bağlı Məmmədli bələdiyyəsinə müraciət etsinlər.

Bundan sonra sakinlər üz tutublar Məmmədli bələdiyyəsinə. Sakinlər Məmmədli bələdiyyəsinin sədri Xəyaləddin Məmmədovun qəbulunda olublar. Bələdiyyə sədri onlara cavabında bildirib ki, yolların çəkilməsi üçün onlara heç bir maliyyə yardımı ayrılmayıb və ona görə də arzunuz ürəyinizdə qalacaq. Bir sözlə iş görüləcək deyə heç bir bələdiyyə sədri ərazinin problemini öz üzərinə götürmür.

Sakinlər bildirirlər ki, övladları Kürdəxanı qəsəbəsində yerləşən məktəbə və uşaq bağçasına gedirlər. Ərazi Kürdəxanı qəsəbəsinin mərkəzində yerləşir. Yeni yaşayış massivinin sakinləri bildirirlər ki, ev tikən zaman adları çəkilən qurumlardan gəlib rüşvət tələb edirlər, amma məsələ iş görməyə gələndə hamısı özlərini geri çəkirlər. Sakinlərin sözlərinə görə qış vaxtı uşaqlarını məktəbə apararkən yollar palçıq olduğu üçün gedib-gələ bilmirlər. Bu günə kimi isə yolarını həmişə öz aralarında pul yığaraq təmir ediblər. Onlar bildirirlər ki, yarımçıq yol çəkməklə bizləri narazı salacaqlarsa, heç bu bizlərə lazım deyil. Qış aylarında Yeni yaşayış massivində yerləşən gölün də tez-tez daşması zamanı sakinlərin evini su basır. Hələ ki, bu problemləri heç bir bələdiyyə sədri həll etmək niyyətində deyil. Ona görə də sakinlər hər iki bələdiyyə sədrinin fəaliyyətindən Birinci vitse-prezidentə şikayət ediblər.

Şikayətçi olan sakinlərin ad və soyadlarını təqdim edirik:

Nadir Əhmədov, Ramiz Quliyev, Vüqar Süleymanov, Ramin Rzayev, Rəşad Rzayev, Saməddin Allahyarov, Anar Quliyev, Kirman Niftəliyev, Hicran Niftəliyev, Eynur Sadıqov, Yılmaz Mövsümov, Bəşir Zəkiyev, Yusif Məmmədov, Elşad Rzayev, Hikmət İsmayılov, Rəşad Sadıqov, Bəhruz Sadıqov, Nizami Əliyev, Ramal Gülməmmədov, Rasim Gülməmmədov, Atababa Qədirov və Ceyhun Allahverdiyev. \\moderator.az\\

Zamantv.az