Moskva Azərbaycan bəstəkarı Fərhəng Hüseynovun “Kodayu” operasının premyerası olub

Moskva Beynəlxalq Musiqi Evində Azərbaycan bəstəkarı, Əməkdar artist Fərhəng Hüseynovun “Kodayu” operasının Rusiya premyerası olub.

AZƏRTAC xəbər verir ki, “Rusiya-Yaponiya qarşılıqlı mədəniyyət İli” çərçivəsində nümayiş etdirilən tamaşa Yaponiya musiqisevərlərinə hələ 1993-cü ildə təqdim edilib. Səhnə əsərinin librettosunu Yaponiya opera müğənnisi Eyko Aoki yazıb.

Müğənninin oğlu, “AOKİ” nəşriyyat evinin rəhbəri Yosihide Aoki AZƏRTAC-a müsahibəsində bildirib ki, opera 1990-cı ildə yazılıb. “Mənim anam Eyko Aoki hər zaman Rusiya ilə dostluq münasibətlərinin qurulmasına çalışıb. XVII əsrdə yaşamış yaponiyalı səyyah Daykoku Kodayunun Rusiyaya səfəri və 11 ildən sonra Vətəninə qayıtması barədə maraqlı tarixi hadisə onun diqqətini cəlb etmişdi. Operanın librettosu hazır olandan sonra anam Azərbaycan bəstəkarı Fərhəng Hüseynova müraciət etdi. Anamın bəstəkar qarşısında qoyduğu əsas şərtlərdən biri o idi ki, operanın musiqisi hamı üçün anlaşıqlı, eyni zamanda, orijinal olsun. Fərhəng Hüseynov bu vəzifənin öhdəsindən layiqincə gələ bildi”.

O həmçinin qeyd edib ki, gələn il Azərbaycana gəlməyi planlaşdırır. “Gələn il bəstəkar Fərhəng Hüseynovun yubileyi ərəfəsində Azərbaycana gəlməyi düşünürəm. Mərhum bəstəkarın Vətəni ilə tanışlıq mənim üçün çox maraqlı olar. Eyni zamanda, “Kodayu” operasının Azərbaycanda səhnələşdirilməsi barədə də danışıqlar aparmaq niyyətim var”, - deyə Yasohida Aoki bildirib.

Bəstəkarın qızı, Bakı Musiqi Akademiyasının müəllimi Tomris Hüseynova AZƏRTAC-ın müxbiri ilə söhbətində xatırladıb ki, 1991-ci ildə Fərhəng Hüseynov “Zamana səyahət” əsərinə görə Tokioda keçirilən beynəlxalq müsabiqənin qalibi olub. Müsabiqə Yaponiyanın “Asaxi” televiziya kanalı və UNESCO tərəfindən təşkil edilmişdi. “Həmin səfəri zamanı atama “Kodayu” operasını yazmaq təklifi gəldi. Çox istərdim ki, atamın gələn il qeyd ediləcək 70 illik yubileyi münasibətilə bu opera Azərbaycanda səslənsin”, - deyə T.Hüseynova vurğulayıb. Tomris Hüseynova, həmçinin tamaşanın yaradıcı heyətini gül zənbili ilə təbrik etmiş Azərbaycanın Rusiyadakı səfiri Polad Bülbüloğluna atasının yaradıcılığına diqqətə görə təşəkkürünü bildirib.

Moskvada operanı “Amadey” Musiqi Teatrının rejissoru Oleq Mitrofanov səhnələşdirib. Rolları “Novaya opera” teatrının solisti Andrey Berus, “Gelikon opera”nın solisti Yelena Semyonova, Rusiya Böyük Teatrının solisti Yelena Okolışeva və başqaları ifa ediblər.

Zamantv.az