Azərbaycanda istehsal olunan siqarlar, ucları kəsilən siqarlar və siqarillaların (nazik siqarlar) ölkədə istifadəsi 0,3 faizdən artıq deyil.
Bunu Sonxeber.az-a Milli Məclisin deputatı Rüfət Quliyev siqarlar, ucları kəsilən siqarlara və siqarillalara (nazik siqarlar) tətbiq edilən vergi dərəcəsinin artırılmasının qiymət artmına təsiri imkanlarını şərh edərkən deyib.
Onun sözlərinə görə, Azərbaycanın tütün məmulatları bazarında bu məhsulların payı maksimum 0,3 faiz təşkil edir.
Millət vəkili qeyd edib ki, bunlar bahalı mallardır və onları varlı adamlar çəkir: "Bu baxımdan həmin malların qiymətinin qalxamasının bir o qədər təsiri olmayacaq".
R. Quliyev əlavə edib ki, bu cür məhsulların Azərbacanda istehsalı geniş vüsət almayıb: " Ölkədə istehsal olunsa belə, bu, çox cüzi miqdar təşkil edir".
Deputat diqqətə çatdırıb ki, Azərbaycanda qəlyan tütünündən istifadədə hər il 7-10 faiz artım müşahidə olunur: "Siqaretdən daha çox qəlyan tütünündən istifadə daha çox inkişaf edib".
Xatırladaq ki, ötən gün Milli MəclisAzərbaycanda istehsal olunan siqarlar, ucları kəsilən siqarlara və siqarillalara (nazik siqarlar) tətbiq edilən vergi dərəcəsinin artırılmasını nəzrdə tutan layihəni təsdiqləyib.
Belə ki, Azərbaycanda istehsal olunan siqarların, ucları kəsilən siqarların və siqarillaların (nazik siqarlar) 1000 ədədinə görə 20 manat vergi tutulacaq. İndiyədək bu rəqəm 10 manat olub.
Dövlət Statistika Komitəsini məlumatına görə, Azərbaycanda 2018-ci ilin yanvar-aprel aylarında 11,51 milyon manat dəyərində tütün məhsulu istehsal olunub. 2017-ci ilin analoji göstəricisi ilə müqayisədə bu göstərici 2,7 dəfə artıb.
Hesabat dövründə Azərbaycan 3,9 milyon dollar məbləğində tütün və onun sənaye əvəzləyicilərini ixrac edib. İdxal isə 34,93 milyon dollar təşkil edib.(sonxeber.az)
Zamantv.az