Cənub zonasında yerləşən Lənkəran, Lerik, Astara rayonlarını Hirkan Milli Parkına və Lənkəran Regional Meşə Təsərrüfatı Mərkəzinə tabe olan meşələr əhatə edir.
Hirkan Milli Parkından son zamanlar təbiətə diqqət və qayğı davamlı olaraq artıbdır. Peşə borclarını layiqincə yerinə yetirməyən və vəzifə səlahiyyətlərindən sui-istifadə edən maddi məsul şəxslərin zamanında tənbeh edilməsi nəticəsində qanunsuz ağac qırılmasının qarşısı alınmışdır. Vətəndaşlarla mütəmadi olaraq aparılan maarifləndirmə görüşləri nəticəsində Parkın nizamnaməsinə tam ciddi riayət olunur. Hal-hazırda fauna və floranın inkişaf etməsi və qorunması üçün zəruri tədbirlər görülür.
Lənkəran Regional Meşə Təsərrüfatı Mərkəzinin tabeliyində olan meşələrdəki vəziyyət isə ürək ağrıdıcıdır. Vətəndaşların dediklərindən belə nəticəyə gəlmək olur ki, bu mərkəzdə şəxsi maraqları təmin edən qaydalar dövlətin qanunlarını ətalətdə saxlayıb. Daha dəqiq desək ,Lənkəran Regional Meşə Təsərrüfatı Mərkəzində çalışan məsul şəxslər bu mərkəzi öz şəxsi mülkiyyətinə çeviriblər. Son zamanlar Lerik rayonunu əhatə edən meşələrdə nadir ağacların qırılması halları mütəmadi olaraq baş vermişdir. Bir saylı Ekologiya idarəsinin apardığı tədbirlər nəticəsində qismən olaraq qanunsuz ağac qırılmasının qarşısı alınsa da, lakin bu prosesi dayandırmaq mümkün deyil. Vətəndaşlar yenə bildirirlər ki, qanunsuz ağac qırdıran məsul şəxsləri Ekologiya və Təbii Sərvətlər Nazirliyində çalışan bəzi yüksək vəzifəli şəxslər tərəfindən himayə olunduğu üçün onlara gözün üstə qaşın var deyən yoxdur.
Lənkəran Regional Meşə Təsərrüfatı Mərkəzində baş verən qanunsuz hallar yetərincədir. Əsasən, iaşə obyektləri və fərdi evlər üçün əlverişli olan meşə sahələri qabaqcadan planlı olaraq qırıldıqdan sonra həmin ərazilər dolayı yollarla vətəndaşlara və bəzi şirkətlərə satılır.
Lənkəran rayon Ləj kənd sakini Nağı Nağıyev bildirir:Lənkəran rayonunun Haftoni meşəbəyliyində 300 hektara qədər meşə məqsədyönlü olaraq məhv edilmişdir. Son zamanlar həmin meşəbəyliyinin 15-cı dolayında olan 40 hektara qədər meşənin özəl şirkətə verilməsi ilə bağlı sövdələşmə olmuşdur. Sözü gedən ərazidə texnikalar vasitəsilə hektarlarla meşə məhv edilmişdir.
Nağı Nağıyevin və digər təbiətsevərlərin məsələyə müdaxiləsindən sonra hələlik həmin ərazidə qanunsuz olaraq təbiətin qırılmasının qarşısı alınmışdır. Lənkəran Regional Meşə Təsərrüfatı Mərkəzinin direktoru (ehtiyatda olan polkovnik) Fizuli Məmmədov bütün baş verən cinayət əməllərinə göz yumur. Bəs səbəb nədir? Çox çalışsaq da bu sualın cavabını tapa bilmədik. Bəlkə Ekologiya nazirliyindən nə vaxtsa bu suala cavab verən tapılar.
Hörmətli polkovnik bilməlidir ki, təbiət ağır zirehli texnikalar üçün nəzərdə tutulmuş hərbi poliqon deyil, sağlam mühitdə yaşamağımız üçün əsas amildir. Mövcud vəziyyətdə biz ən güclü düşmənimiz olan Koronavirusa qarşı vuruşub özümüzü qoruyuruq. Lakin bu virusdan daha təhlükəlisi Lənkəran Regional Meşə Mühafizəsi Mərkəzinin tabeliyində olan, meşələri vəhşicəsinə qırdırıb sağlamlığımızı zərbə altına qoyan maddi məsul şəxslərdir. Ümid edirik ki, Ekologiya və Təbii Sərvətlər Nazirliyi sözügedən məsələ ilə bağlı qanuna müvafiq tədbir görər. El məsəlidir, yeməkdən ümid yaxşıdır.
PS. Ekologiya və Təbii Sərvətlər Nazirliyindən, Lənkəran Regional Meşə Təsərrüfatı Mərkəzindən və adı çəkilən hər kəsdən açıqlama gözləyirik.
PS. Mövzuya yenidən qayıdılacaq. Diqqətimizdədir.
Z.SƏMƏDOV
Zamantv.az