MTK rəhbərlərindən növbəti fırıldaq: - Sakinləri üzvlüyə dəvət edirlər

26 Avqust 2020-ci il tarixində Azərbaycan İqtisadiyyat Nazirliyi yanında Dövlət Əmlak Xidməti, istifadəyə qəbul edilmiş yeni yaşayış binalarındakı mənzillər üçün "Mülkiyyətini qeydiyyata aldır və onun sahibi ol" kampaniyası çərçivəsində sənədlərin növbəti ərazilər üzrə qəbulunu keçirmək niyyətində olduğunu bildirdi. Qeyd olundu ki, vətəndaşların mənzillərə mülkiyyət hüquqlarını təsdiq edən dövlət reyestrindən çıxarışın (“kupça”) icrası 15 iş günü ərzində aparılır.

Çoxsaylı mənzil-tikinti kooperativlərindən (MTK) mənzil almaqla özünü işə salan şəxslərin problemləri barədə dəfələrlə yazmışıq. Bu arada xatırladırıq ki, 30 iyun 2009-cu ildə qəbul edilmiş Azərbaycan Mənzil Məcəlləsinin 109.5-ci maddəsinə əsasən, kooperativ evinin tikintisi və ya yenidən qurulması başa çatdıqdan və kooperativ üzvlərinin mülkiyyətinə 50 faiz keçirildikdən sonra Azərbaycan Mənzil və Mülki məcəllələrinə uyğun olaraq, MTK bir ay ərzində ləğv edilməli və ya mənzil sahiblərinin yaradacağı ortaq bir şirkətin mülkiyyətinə keçirilməlidir.

Ancaq qanunun bu tələbinə baxmayaraq, tikinti başa çatdıqdan sonra da mənzil-tikinti kooperativləri sakinlərdən elektrik enerjisi və kommunal xidmətlər üçün ödənişlər toplamağa davam edir. Üstəlik, elektrik enerjisinin və kommunal xidmətlərin qiymətini onlar özləri təyin edirlər.

Yəqin ümid etmək olardı ki, çıxarış aldıqdan sonra vətəndaşlar mənzillərini özləri idarə edə biləcəklər. Lakin...

Bu yaxınlarda əlimizə Ruslan Əsədov adlı şəxsin onun “Şaiq” MTK-ya üzv qəbul edilməsi barədə müraciəti keçdi. Kooperativ rəhbərliyi Ruslan Əsədovun tələbini təmin edib və ona Dadaş Bünyadzadə küçəsi, 34 B ünvanında yerləşən binada mənzil verib.

D.Bünyadzadə küçəsi, 34 B ünvanında yerləşən binanın sakini Aytən Hüseynova AYNA-ya deyib ki, MTK rəhbərliyi illərlə mənzillərində yaşayan bütün ev sakinlərini belə müraciətlər yazmağa “dəvət edir”: “Bu addım mənzil kooperativini qorumaq və mənzillərimizə çıxarış verildikdən sonra da evimizi idarə etmələri üçün atılır”.

“Səbail” Mənzil Mülkiyyətçiləri Cəmiyyətinin rəhbəri Əbülfət Rzayev də AYNAA-ya açıqlamasında, MTK rəhbərlərinin öz gəlirlərini itirmək istəməmələri üçün belə bir varianta əl atdıqlarını bildirib: “Onlar mənzil sahiblərini əvvəlki kimi qarət etmək istəyirlər. Buna görə sakinlər hər yerdə kooperativə qoşulmaq üçün müraciət yazmağa məcbur olurlar. Bu, qanun tələblərinə tamamilə ziddir. Çünki qanunda bir yaşayış binasının idarə edilməsinin Mənzil Mülkiyyətçilərinin Birgə Cəmiyyətinə verilməsi açıq şəkildə göstərilib. Ancaq onları qanunun tələbləri maraqlandırmır”.

İqtisadiyyat Nazirliyi yanında Dövlət Əmlak Xidmətinin MTK rəhbərlərinin yeni tikilmiş binaların idarəçiliyini öz nəzarətlərində saxlamaq cəhdlərindən xəbərdar olub-olmadığını öyrənmək qərarına gəldik. “Bu sualın bizə heç bir aidiyyəti yoxdur. Mənzil sahibləri evlərinin tam hüquqlu sahibləridir. Əgər onları kimsə kooperativlərə daxil olmağa məcbur edirsə, polisə müraciət etsinlər”, - deyə Xidmətdən AYNA-ya bildirdilər.

Ümid edirik ki, buna baxmayaraq, dövlət qurumları məsələyə müdaxilə edib, ev sahiblərinin mülkiyyət hüququnu təmin edəcəklər. Axı, necə deyərlər, xalq bilmək istəyir...

Zamantv.az