Ümidim yalnız Sizədir cənab Prezident!

Oğlum Şalyarov Ülvi Calaləddin oğlunun səhhətində müəyyən problemlər yaranmışdı. Mən ata olaraq Şalyarov Calaləddin Əsgər oğlu Ülvini müayinə və müalicə üçün bir sıra mütəxəsis həkimlərə müracət etdim. Lakin həkimlər dəqiq diaqnoz verməkdə çətinlik çəkib. Qeyd edirdilər ki, elə ciddi problemlər yoxdur. Ona görə də oğlumun səhhətində yaxşılığa və ya pisliyə doğru heç bir dəyişiklik yox idi. Əvvəllər əlaqəmiz olan eyni məhəllədə yaşayan Qədirova Roza Qasım qızı bizə zəng edərək bildirirdi ki, Ülvinin səhhətində ciddi problemlər var. Bizim cadugər falçılarımız bu problemi görüblər və həlli yollarını bilirlər. Bundan sonra biz onun istədiyi 2016-cı il aprel ayından, 2018-ci ilin oktyabr ayına qədər müddətdə hissə-hissə cəmi 96.000 manat pul ödədik. Lakin cadugar falçının “əmyəindən” heç bir müsbət nəticə hasil olmayıb. Nəticə olmadığından biz ondan ödədiyimiz məbləği geri verməyi tələb etdik. O isə bundan imtina etdi. Bu məsələ ilə bağlı bütün danışıqlar telefon vasitəsilə qeydə alınıb, məhkəmə ekspertizası mərkəzində təsdiqlənib. Beləliklə 04 fevral 2019-cu il tarixində 102 xidmətə zəng vuraraq polisə şikayət etmişəm. Abşeron RPİ-nin müstəntiqi keçmiş Quba rayon prokuroru Nazim Hacıyevin oğlu (öz təqdimatına görə) Babək Hacıyev tərəfindən araşdırma aparılıb. Mənimlə pulun yarısı onun olmaq şərti ilə mənim xeyrimə iş araşdıracağına söz verib. Əlbəttə, mən onunla razılaşmadım. 09 fevral 2019-cu il tarixində cinayət işinin başlanmasının rədd edilməsi barədə qərar verib. Lakin qərarın verilməsi barədə 19- mart 2019-cu ildə xəbərdar oldum. Ondan sonra mən Abşeron RPİ-nə dəfələrlə müraciət etsəm də idarə rəisi polis polkovniki Şəhriyar Şəmşirlinin qəbuluna düşə bilmədim. Mən vəkil tutmaq məcburiyyətində qaldım. Tanıdığım müstəqil vəkil Əli Xançoban oğlu Eyvazovla müqavilə bağladım. Polis müstəntiqi Babək Hacıyevin verdiyi qərardan prokurora şikayət ərizəsi ilə müraciət etdim. Prokurorluq bütün materiallları araşdırdıqdan sonra Babək Hacıyevin verdiyi qərarı ləğv etdi. İşin aparılamsı Abşeron RPİ-nin baş müstəntiqi 14 iyul 2019-cu ildə polis mayoru Eldəniz Əsgərova həvalə olundu. Abşeron RPİ-nin baş müstəntiqi Eldəniz Əsgərov cinayət işinin başlanması barədə Azərbaycan Respublikasının CM-nin 178.2.4 maddəsi ilə cinayət işinin başlanması barədə qərar verdi. 09 sentyabr 2019-cu ildə cinayət əməlinin sübuta yetdiyinə görə 178.2.4 maddəsi daha ağır maddə ilə əvəz olundu, yəni 178.3.2 tövsif olunmuşdur. Bütün istintaq tədbirlərinin görülməsinə baxmayaraq cinayətkar barəsində heç bir tədbir görülməmişdir. Mən də müstəntiqlərin və digər hüquq mühafizə orqanlarının yarıtmaz əməllərindən Prezidentə, Baş Prokurora, Daxili İşlər Nazirinə qəbulumla bağlı çoxsaylı müraciət etmişəm. Belə müracətlərdən sonra nəhayət Daxili İşlər Naziri polis general polkovniki Vilayət Eyvazov ölkə prezidentinin göstərişi ilə vətəndaşların regionlarda qəbulu çəçivəsində məni 29 noyabr 2019-cu il tarixində Sumqayıt şəhərində qəbul etdi.
Amma qəbuldan əvvəl 18 noyabr 2019-cu il tarixində Abşeron RPİ-nin rəisi polis polkovniki Şəhriyar Şəmşirli işi aparan müstəntiq Eldəniz Əsgərovun iştirakı ilə məni qəbul etdi. Ona irad bildirdim ki, nəyə görə mən dəfələrlə müraciət etməyimə baxmayaraq qəbulunuza düşə bilməmişəm. O isə sadəcə müxtəlif bəhanələr gətirdi. Göstəriş verərək bildirdi ki, cinayətkardan 25.000 manat pulu alıb mənə versinlər. Bu adam da Nazirin qəbuluna getməsin. Əks təqdirdə cinayətkarı həbs edin. Mənim pulumun hamısı olmadığına görə mən bu təklifdən imtina etdim. Onlar da cinayətkarı həbs etmədilər.
25 noyabr 2019-cu il tarixində müstəntiq Eldəniz Əsgərov mənə zəng edərək bildirdi ki, bu gün saat 14:00 dan sonra Daxili İşlər Nazirliyi Baş İstintaq və Təhqiqat idarəsinin rəis müavini polis polkovniki Emin Məmmədov səni qəbul edəcək. Həqiqətən də qəbul baş tutdu, mənə qəbuldan sonra sənin işin düzəlib deyərək ərizə yazıb Nazirin qəbulundan imtina etməyi təkif etdi. Mən bununla da razılaşmadım və nazirin qəbulunda oldum. Qəbul günü məndən qabaq cinayətkar Roza Qədirovanı qəbula salmışdılar. Mən qəbula girərkən o, ağlaya-ağlaya çıxırdı. Qəbulda Nazir məni diqqətlə axıra qədər dinlədi. Ərizəmi qəbul etdi və işin dəqiq araşdırılmasına söz verdi. Bu zaman Şəhriyar Şəmşirli yerindən qalxaraq mənə qarşı böhtan xarakterli, cinayətkarı müdafiə etmək məqsədilə ittiham irəli sürdü. Yalançı ittihamda qeyd olunurdu ki, guya mən Roza Qədirovadan onun oğlunun əsgəri xidmətdə olarkən, mənə məlum olmayan hansısa problemlərini həll etmək məqsədi ilə guya 11.000 manat pulunu alıb mənimsəmişəm. Nazirin göstərişi ilə cinayət işi üzrə toplanmış materiallar 12 dekabr 2019-cu ildə DİN-nin Baş İstintaq və Təhqiqat idarəsinin Ağır Cinayətlərin İstintaqı şöbəsinə verilib. İstintaq işi həmin şöbənin müstəntiqi polis mayoru Elmar Quliyevə həvalə olunur ( otaq №424; iş telefonu 012 590 97 32). Lakin üstündən xeyli vaxt keçməsinə baxmayaraq cinayətkar barəsində heç bir tədbir görülməyib. Mənə şifahi formada bütün iddialarımın təsqiqləndiyini bildirsə də, mənə qarşı müxtəlif, lüzumsuz tələblər irəli sürür. Məsələn: Şahidlər tapmaq, oğlumun və mənim məhkəmə tibbi ekspertizadan keçməyimi tələb edir. Bu isə açıq-aşkar izafi süründürməçilik və cinayətkarı müdafiə etməkdir. Mənə təzyiq vasitəsi olaraq müqavilə bağladığım vəkil Əli Eyvazovu işdən uzaqlaşmağa məcbur etdilər. Hal-hazırda Əli Eyvazovu tapa bilmirəm. Telefon zənglərimə cavab vermir. Müqavilə rüsumu olaraq ona ödədiyim 500 manat pul boş yerə xərclənmiş oldu.
Həmçinin MAQ LTD şirkətinin təsisçisi Mürvələdov Aydın Qurban oğlu Gülbax daş karxana¬sının rəhbəri Abdüləzimov Cavanşir Bəşir oğlu Roza Qədirova ilə əlaqələri olduğu halda onların istintaqa cəlb olunmasını təmin etmirlər. Halbuki bu cinayətdə Roza Qədirova onlarla əlbir olub, cinayət ortağıdır. Nəticə olaraq mən öz iş yerimi itirmişəm, vəzifəmdən kənarlaşdırılmışam.
Belə görünür ki, müstəntiq polis mayoru Elmar Quliyev cinayətkarı müdafiə etdiyindən istintaq işini qanuni formada başa çatıdırmaq istəmir. Sübut olaraq hələ də cinayətkarın azadlıqda olması və məndən lüzumsuz sənəd və sübutlar tələb etməsidir. Aydın olan odur ki, belə süründürməçi müstəntiqlər Naziri, Prezidenti saya salmırlar. Qanunlara sayğı, haqqın tələb edən vətəndaşa qayğı göstərmirlər. Belə görsənir ki, neqativ hallar, süründürmələr, qanunlara məhəl qoymamaq, vəzifələrini yerinə yetirməmək, vəzifə səlahiyyətlərini aşmaq, öz mənfur mənafelərini güdmək kimi əcaib üsullar Nazirlikdə də adi hal alıb. Onlar prezidentə yalan məlumat verirlər, onu aldadırlar. Bunula da prezident ilə millət arasında uçurum yaradırlar. Qanunlara etimatsızlıq qəbul olunan hal deyil. Bunu mənfur məmurlar yaradır. Belə hadisələr siyasi cinayətə bərabərdir. Onlar bu gün qorxmurlar. Amma geci-tezi var. Saxta əməllərinə görə mütləq cavab verməli olacaqlar. Tutduğu vəzifələrdən qovulmuş, cinayətə cəlb olunmuş belə məmurların taleyi bunlara örnək deyildir. Amma haqq öz yerini alacaq.

Zamantv.az