Əvvəl: "Melorasiya və Su Təsərrüfatı" ASC - rəhbəri Zaur Mikayılov

İndi: Azərbaycan Dövlət Su Ehtiyatları agentliyi - sədri Zaur Mikayılov

Ölkə başçısının müvafiq sərəncamına əsasən qurumun adı dəyişdirildi, amma nə fəaliyyətində, nə də strukturda heç bir dəyişiklik olmadı.

Demək ki, "toplananların yerini dəyişdikdə, cəm dəyişmir".

Fəaliyyət və strukturda dəyişiklik yoxdursa, istənilən sahədəki özbaşınalıqlar da, qanunsuzluqlar da, barəsindəki narazılıqlar da, şikayətlər də olduğu kimi qalacaq. Necə ki, Zaur Mikayılov və onun tabeliyində çalışan müavinindən tutmuş, bölgələrdəki müdirlərə qədər hamısından şikayətlər əvvəl də var idi, bu gün də var. Nəzərə çarpan dəyişiklik isə yalnız, bu qurumda çalışanların özgüvənlərinin daha da artaraq, ifrat dərəcəyə çatmasıdır. Onlara görə hətta vətəndaşa səsini qaldıran rəhbərə olan arxayınçılıq və bu arxayınçılıqdan irəli gələn rüşvət, yeyinti faktları bu gün bütün bölgələrdə insanların narazılığına səbəb olub.

Deyəsən, ölkə xaricində "biznesin idarə olunması" ixtisasına yiyələnən Zaur Mikayılov, rəhbəri olduğu dövlət qurumunu da ixtisasına uyğun və əvvəl işlədiyi şəbəkə market formatında həyata keçirir.

Biz əvvəllər də Zərdab rayon Suvarma Sistemləri idarəsinin rəhbəri Əhliman Kərimovun fəaliyyətində yol verdiyi nöqsanlar, korrupsiya halları və digər qanunsuzluqlar barəsində "DogruXeber.az" informasiya portalında, eləcə də "Kanal14" YouTube kanalında faktlar təqdim etmişdik. Eyni zamanda, həmin faktları sorğu şəklində aidiyyatı qurumlara da göndərmişdik. Amma, Kürdəmir rayon Suvarma Sistemləri İdarəsinin rəhbəri vəzifəsindən korrupsiya ilə işdən çıxarılıb, barəsində cinayət işi açılan, hətta həbs olunub, sonra "sirli səbəblərlə" azadlığa çıxan, hələ bu da azmış kimi Zərdab rayon Suvarma Sistemləri İdarəsinə müdir təyin olunan Əhliman Kərimov bu gün də öz kürsüsündə əyləşib, "pulunu yığır".

"Pulunu yığır" deyərkən, idarənin texnikalarını icarəyə verib ordan aldığı, idarənin texnikaları üçün dövlətin ayırdığı yanacağı satıb, ordan aldığı, işə işçi götürərkən onlardan aldığı... və sair pullardan söhbət gedir ki, bütün bunlar barəsində əvvəllər bu idarədə mühəndis işləyən Şəmsi Əhmədov ətraflı şəkildə açıqlama vermişdi.

Qeyd edək ki, məlumata görə Əhliman Kərimov Kürdəmir rayonunda özü işdən çıxarılsa da, fürsət tapıb, oğlunu həmin idarədə mühim vəzifəyə qoydurub.

Xatırladaq ki, haqqındakı bütün məlumatlar barəsində Əhliman Kərimovun mövqeyini öyrənmək üçün ona zəng etdiyimizdə, hər kəsin fəaliyyətini özününkü ilə eyni bilib, "bu məsələni dayandır, kartını da at mənə bir 50 manat göndərim, kontur alarsan" demişdi.

Danışdıqca, kimliyini daha da bəlli edən bu adam sonradan ümumiyyətlə susdu. Susdu ki, özünün yaratdığı bataqlıqda daha da batmadan, himayədarları onu qoruya bilsin. Hələ Kürdəmir rayonunda işlədiyi zamanlarda onun fəaliyyətinin narazı saldığı vətəndaşlardan birinin redaksiyamıza bildirdiyinə görə, Zaur Mikayılova yaxınlaşıb, özünü təqdim edib, Əhlimandan şikayət edən kimi, Zaur Mikayılov, - "Mən səni xatırladım. Bəsdir də, nə istəyirsən, imkan ver işləsin də", deyə ona səsini qaldırıb.

Amma , sonradan bu narazılıqları səsinin tonu ilə azalda bilməyəcəyini anlayıb, Əhliman Kərimovu (müvəqqəti olaraq) işindən azad etdi. Maraqlıdır ki, Kürdəmir rayon Suvarma Sistemləri İdarəsinin hazırkı müdiri Tahir Xəlilov də öz sələfinin fəaliyyətini eyni qaydada davam etdirir və bununla da narazı vətəndaşların sayını "qoruyub saxlayıb".

Tahir Xəlilovun insanlardan pul alıb, işə götürməsi, özünün işə gəlməməsi, telefon zəngi ilə müavinləri yönləndirməsi, günlərinin kollektivin ona yaxın üzvləri ilə restoranda yeyib-içməkdə keçirməsi və sair məlumatlar barəsində mövqeyini öyrənmək üçün, ona zəng etdik. Özümüzü təqdim edib, barəsindəki məlumatlara dair sual vermək istəyərkən, o, "sən kimsən mənə sual verirsən" deyə, səsinin tonunu qaldırdı.

Mətbuat nümayəndəsi ilə danışmağı bacarmayan, əgər, (qanunlar düzgün icra olunarsa) mətbuat nümayəndəsi ilə bu tonda danışdığına görə onu hansı qanuni cəzanın gözlədiyini bilsəydi, yəqin ki, bu qədər "cəsarətli" olmazdı. Amma, bilmir. Marketdən dövlət qurumuna "transfer olunan" kadrın bildiyi anca bu qədər olar...

Bildikləri və etdiklərinə rəğmən "dilini dinc saxlamağı da bacarmayan" Tahir Xəlilov, bizə verilən məlumata görə bir dəfə "dilinin bəlasına da düşüb". Yerli sakinlərin sözlərinə görə, restoranda yaxşıca yeyib-içdikdən sonra, rayonun kişiləri barəsində təhqiramiz ifadələr işlədərək, "kiçik bir axtarışa çıxıb". O, "axtarışın nəticəsi" isə Tahir Xəlilova sözün əsl mənasında ağır zərbə olub. Bir neçə gün gözlərdən uzaq olub, sonra eynəklə cəmiyyət içinə çıxan bu cavan oğlan, ikinci vətən müharibəsi zamanı harda olduğunu bilmirik, amma bu dəfə qarşımıza kimsədən qorxub-çəkinmədiyini sübut edəcək səs tonu ilə çıxdı.

Necə deyərlər, "həm suçlu, həm güclü"...

Yeri gəlmişkən, Kürdəmir rayonundan əvvəl Şəmkir rayon Suvarma Sistemləri İdarəsində 6 aylıq müdir keçmişi olan Tahir Xəlilov orada yerli sakinlərə və eləcə də çalışanlara "elə od qoyub" ki, "Ulduz" filminin Məhəmmədi demişkən, hələ "6 il tüstüsü təpələrindən çıxacaq".

Artizan quyularının qazılması və bərpası üçün dövlət büdcəsindən pul ayrılmasına baxmayaraq baxmayaraq, yerli sakinlər onlardan pul yığılması barəsində "Kanal14" YouTube kanalında canlı yayımlanan "Kamalın zamanı" proqramında etiraz bildirirdilər. Bundan əlavə, idarənin iş zamanı yüksək gərginlikli elektrik xətlərinin olduğu yerdə işlədilən texnikalarından birinin sürücüsünün ölümü hadisəsi belə baş verib. Lakin, hər kəsdən gizlədilən ölüm hadisəsi dərhal ört-basdır edilib, ardından isə Tahir Xəlilov Kürdəmir rayon Suvarma Sistemləri İdarəsinə müdir gedib. Orada da özünə kifayət qədər narazı vətəndaş "auditoriya"sı topladığına görə, bəlli ki, başına nə gəlirsə-gəlsin vərdiş elədiyi iş üsulunu davam etdirir.

Yeri gəlmişkən, Tahir Xəlilov ilə yenicə danışmışdıq ki, bu "vurhavurda" Əhliman Kərimovdan bizə zəng gəldi. Deyir, "nə məsələdir?".
Soruşuruq, "hansı məsələ" ?

Deyir, "mənə link atdılar ki, orda nəsə yazılıb məndən. Mən də dedim görüm nə məsələdir". Amma, bizimlə danışdığı zaman Əhliman Kərimova gələn telefon zəngi deyəsən bizi ona xatırlatdı, "hə bildim, oldu, cavab göndərərik" deyib, tələsik sağollaşdı.

Görünür, daha yaddaşı sözünə baxmayan bu ağsaqqal ildən artıqdır ki, "ünlü iş adamı" olduğundan xəbərsizdir. Amma, maraqlıdır ki, aidiyyatı qurum olan Dövlət Su Ehtiyatları agentliyi (DSEA) də Əhliman Kərimovla birlikdə öyrənmiş oldu. Baxmayaraq ki, yuxarıda qeyd etdiyimiz kimi, hələ bir il əvvəl biz bütün faktları yayımlamadan öncə aidiyyatı qurumlara da rəsmi sorğu şəklində göndərmişdik. Eyni zamanda, "DogruXeber.az" informasiya agentliyinin tabeliyində fəaliyyət göstərən bütün saytlarımızda və "Kanal14" YouTube kanalında yayımlamışdıq. Lakin, bir neçə gün əvvəl DSEA-nin facebook səhifəsi bu məlumatların şərh bölməsində bizdən əlaqə nömrəsi istədi. Saytın əlaqə bölməsində nömrəmiz qeyd olunsa da təkrar şərh bölməsində yenə qeyd etdik. Amma...

Bəli, düz anladınız, amma yenə susdular.

Bu müddətsiz sükutun səbəbi isə düz DSEA-nə qədər uzanır. Etibarlı mənbənin redaksiyamıza verdiyi məlumata görə Əhliman Kərimov Zaur Mikayılovun "oliqarx məmur" kimi tanınan, Londonda milyon dollarlıq villası və digər biznesləri ilə mətbuatda özünəməxsus yer tutan müavini Rafiq Aslanovun tələbə yoldaşı imiş. Yeri gəlmişkən, Tahir Xəlilovun da Zaur Mikayılovun məhz özünün keçmiş iş yoldaşı olduğu deyilir. Yəni, bir zamanlar "Bravo" super marketdə birlikdə işləyiblər.
Yəqin buna görədir ki, hər iki müdirin "kəsdiyi başa, sorğu yoxdur".

İndilik bu belədir, lakin ümid edirik ki, tezliklə qanunlar dövlətin büdcəsinə və dövlət qurumunun nüfuzuna zərər verən bu şəxsləri mühakimə edəcək.

Mövzunu davam etdirəcəyik.

Redaksiyamız hər kəsin söz haqqını tanıyır.

DogruXeber.az

Bu gün Azərbaycan və Ermənistan arasında sərhəddə Azərbaycan Baş nazirinin müavini Şahin Mustafayevin və Ermənistan Baş nazirinin müavini Mqer Qriqoryanın sədrliyi ilə Azərbaycan Respublikası ilə Ermənistan Respublikası arasında dövlət sərhədinin delimitasiyası üzrə Dövlət Komissiyası və Ermənistan Respublikası ilə Azərbaycan Respublikası arasında dövlət sərhədinin delimitasiyası və sərhəd təhlükəsizliyi məsələləri üzrə Komissiyanın səkkizinci görüşü keçirilib.

Görüş zamanı komissiyalar aşağıdakılar barədə razılığa gəliblər:

- Delimitasiya prosesinin ilkin mərhələsində Tərəflər sərhəd xəttinin ayrı-ayrı hissələrinin Sovet İttifaqı çərçivəsində onun süqutu dövrünə mövcud olduğu hüquqi cəhətdən əsaslandırılmış respublikalararası sərhədə uyğun olaraq Bağanis (ER) - Bağanıs Ayrım (AR), Voskepar (ER) - Aşağı Əskipara (AR), Kirants (ER) – Xeyrımlı (AR) və Berkaber (ER) - Qızılhacılı (AR) yaşayış məntəqələri arasında bilavasitə keçməsini razılaşdırıblar.

- Qərara alınıb ki, sərhəd xəttinin bu hissələrinin təsviri koordinatları yerdəki geodeziya ölçmələrinə əsaslanaraq dəqiqləşdirilməsi nəzərə alınmaqla tərtib edilsin və bu, Tərəflər arasında 15 may 2024-cü il müddətinədək müvafiq Protokol-təsvirlə sənədləşdirilərək razılaşdırılmalı və imzalanmalıdır.

- Razılaşdırılıb ki, Tərəflər sərhəd xəttinin razılaşdırılmış hissələrində öz sərhəd xidmətlərinin eyni vaxtda və paralel yerləşdirilməsi üçün tədbirlər görmək məqsədilə öz hökumətlərinə müraciət edəcəklər. Həmçinin razılaşdırılıb ki, delimitasiya prosesi tam başa çatana qədər Protokol-təsvirdə göstərilən sərhəd xəttinin hissələri delimitasiya edilmiş hesab olunsun.

- Paralel olaraq, Azərbaycan Respublikası ilə Ermənistan Respublikası arasında dövlət sərhədinin delimitasiyası üzrə Dövlət Komissiyasının və Ermənistan Respublikası ilə Azərbaycan Respublikası arasında dövlət sərhədinin delimitasiyası və sərhəd təhlükəsizliyi üzrə Komissiyanın Birgə fəaliyyəti haqqında Əsasnamə layihəsinin razılaşdırılması üzrə işin 1 iyul 2024-cü il müddətinədək başa çatdırılması və dövlətdaxili razılaşdırmalar prosesinə və müvafiq qaydada Tərəflərin dövlətlərinin qanunvericiliyinin tələblərinə uyğun olaraq Əsasnamənin təsdiqinə başlamaq barədə razılığa gəlinib.

- Tərəflər razılaşıblar ki, onlar delimitasiya prosesində 1991-ci il Alma-Ata Bəyannaməsinə əsaslanacaqlar. Tərəflər, həmçinin həmin baza prinsipini Əsasnamə layihəsində təsbit etmək barədə razılığa gəliblər (əgər gələcəkdə Azərbaycan Respublikası ilə Ermənistan Respublikası arasında sülhün və dövlətlərarası münasibətlərin qurulması haqqında Sazişdə başqa cür qərara gəlinərsə, o zaman Əsasnamənin müvafiq bəndi bu Sazişlə müəyyənləşdirilmiş prinsiplərə uyğunlaşdırılacaq).

- Tərəflər Əsasnaməni təsdiq etdikdən sonra növbəliliyi razılaşdırmaq və sərhədin bütün digər hissələrinin, o cümlədən anklav və eksklav məsələləri üzrə delimitasiya prosesini davam etdirmək barədə razılığa gəliblər.

Görüşün nəticəsində protokol imzalanıb. Növbəti görüşün keçirilməsi tarixinin və yerinin işçı qaydada razılaşdırılması qərara alınıb.

Hər ilin 24 aprel tarixi ermənilər üçün xüsusi bir gün sayılır. Həm Ermənistanda, həm də digər ölkələrdə yaşayan haylar 24 aprel tarixini vay-şüvən, ahu-zarla keçirərək uydurulmuş soyqırımını qeyd edirlər. Ulu babaları sərgərdan qaraçı olan və Cənubi Qafqaza əsasən XVIII əsrdə zorla yerləşən bu xalqın nümayəndələri işlərini o qədər ustalıqla icra edirlər ki, bir neçə ölkə bu qondarma günü tanıyaraq, parlamentlərində erməni soyqırımı barədə qanun da qəbul ediblər. Düzdür, bu qərarların qəbulu əsasən siyasi motivlərə dayanır.Hətta Amerikada yaşayan ermənilər bir az da irəli gedərək, məsələnin ABŞ Konqresində müzakirəsinə çıxarılmasını istəsələr də, Türkiyə tərəfinin sərt mövqeyi və hələ də ayıq-sayıqlığını itirməyən bir sıra konqresmenlərin sayəsində bu addım atılmayıb. 1915-ci ildə Osmanlı imperiyasında baş verən hadisələrin 109-cu ildönümü ərəfəsində İrəvanda maraqlı hadisələr qeydə alınıb. Baş nazir Nikol Paşinyanın bəyanatı Türkiyə tərəfindən müsbət dəyərləndirilə və münasibətlərin normallaşdırılması üçün xoş addım sayıla bilər.

Məsələ burasındadır ki, 13 aprel tarixində baş nazir “Ermənistan Respublikasının sosial psixologiyası” mövzusunda mühazirə oxuyub. Qondarma erməni soyqırımı məsələsinə toxunan Paşinyan bir dəfə də olsun bu termindən istifadə etməyib. Bunun əvəzinə isə “böyük fəlakət” və “qətliam” sözlərinə üstünlük verib. Eyni zamanda vurğulamaq lazımdır ki, bir saatlıq leksiya zamanı hökumət başçısı bu məsələdə də Rusiyanı günahlandırıb. O, qeyd edib ki, qondarma soyqırımı məsələsi SSRİ tərəfindən qızışdırılıb və məsələ 1946-cı ildən başlayıb. Daha dəqiq desək, Rusiya ilə Türkiyə arasında münasibətlərin pisləşməsi və NATO-nun yaranması ilə eyni dövrə təsadüf edib. Baş nazir iddiasına görə, Kreml “soyqırımı”ndan qaçan mühacirlərin geri qaytarılmasını təşkil etdi.

Dövlət başçısı eyni zamanda qeyd edib ki, Rusiya 1915-ci ildə regionu tərk edib və böyük fəlakət baş verib. Guya bir sıra daxili problemlər səbəbindən Moskva ərazini tərk ediblər və dəqiq seçim edən ermənilər Türkiyə ilə təkbətək qalıblar.

Qeyd etmək yerinə düşər ki, Paşinyan bu məsələdə tarixi faktları təhrif edib. Birincisi, rus ordusu Qafqazı 1915-ci ildə yox, 1917-ci ildə tərk edib. İkincisi, Osmanlı İmperiyasında fəaliyyət göstərən erməni siyasi partiyaları ilə “Gənc Türklər” arasında Şərqi Anadoluda erməni dövlətinin yaradılması ilə bağlı razılaşmalar barədə məlumatı olan Çar Rusiyası erməni məsələsindən Osmanlı imperiyasını zəiflətmək üçün bir vasitə kimi istifadə etməkdə ehtiyatlı davranırdı. “Böyük Ermənistan” xülyası adlı xəritədən isə Fransadakı rus kəşfiyyatı 1902-ci ildən məlumatlı idi. 1914-cü ildə Türkiyə ilə müharibənin başlanması erməni planlarının həyata keçirilməsini asanlaşdırdı. Yaşadıqları dövləti arxadan vuraraq türk kəndləri qılıncdan keçirən erməni silahlı dəstələri isə ordu mənsubları tərəfindən cəzalandırıldı. Bir sıra ermənilər isə qorxuya düşərək ərazini tərk etdilər. Bu isə sonradan soyqırımı nağılını yaratmaq üçün əla fürsətə çevrildi.

Göründüyü kimi, baş nazirin çıxışı Türkiyə ilə münasibətləri normallaşdırmaqla yanaşı, Rusiyanı günahlandırmağa yönəlib. Dövlət başçısı bu addımı ilə bu günə qədər az qala Ermənistanın başına gələn bütün müsibətlərdə Kremli günahlandırmaq dəst-xəttinə davam edir. Onun bu çıxışı isə İrəvanda siyasi qalmaqala səbəb olub. Müxalifətlə yanaşı, diaspor və kilsə də Paşinyanı sərt şəkildə tənqid edərək, Türkiyənin qulu olmaqda ittiham edib.

Maraqlıdır ki, baş nazirdən sonra hakim partiyanın ruporlarından biri sayılan, deputat Andranik Köçəryan da bənzər bəyanatla çıxış edərək bildirib ki, 1915-ci il hadisələrinin qurbanlarının tam siyahısını hazırlamaq lazımdır. Erməni təbliğat maşını bu günə qədər tarixi faktları gözardı edərək, qondarma soyqırımı nəticəsində 1.5 milyon dinc erməninin qətlə yetirildiyini iddia edir. Bununla yanaşı, rəqəmi sübut edən heç bir sənəd və sübut da yoxdur. Köçəryanın sözlərinə görə, bütün qurbanların adlarını dəqiqləşdirmək lazımdır.

Deputat Ovik Ağazaryan da polemikalara qoşularaq, bildirib ki, müasir Türkiyə 1915-ci ildə baş verən hadisələrə görə hüquqi məsuliyyət daşımır. O, həmçinin xatırladıb ki, həmin dövrdə ermənilər Osmanlı imperiyasının tərkibində yaşayıblar və öz dövlətləri olmayıb. Deməli, Ermənistanın 1915-ci il hadisələri ilə bağlı Türkiyədən heç nə tələb etməyə haqqı yoxdur.

Qeyd etmək yerinə düşər ki, dünya ermənilərinin uzun illər Türkiyəyə qarşı apardıqları saxta “soyqırımı” ittihamları və təbliğat Ankara ilə İrəvan arasında münasibətlərin normallaşmasına mane olan səbəblərdən biridir. Bu səbəbdən də hakim partiyanın birdən-birə bu məsələyə maraq göstərməsi və az-çox reallıqları etiraf etmə cəsarəti əslində qonşu dövlətlə münasibətləri həqiqətən də normallaşdırmaq istəyindən xəbər verir.

Yuxarıda da qeyd edildiyi kimi, bu açıqlamalar Ermənistanda çox ciddi rezonansa səbəb olub. Edmon Marukyan, Tiqran Abramyan, Arman Tatoyan kimi siyasətçilər kəskin bəyanatlarla çıxış edərək “Vətəndaş müqaviləsi” deputatlarını vətənə xəyanətdə ittiham ediblər. Məsələ burasındadır ki, Paşinyan və komandasını tənqid edən şəxslər tarixi çox yaxşı bilirlər və anlayırlar ki, erməni mifinin sonu yaxınlaşır. Çünki Köçəryanın dediyi kimi, 1.5 milyon nəfərin siyahısını tərtib etmək mümkün deyil. Bu qədər ad və soyadı uydurmaq isə son dərəcə çətin olacaq.

Məsələyə Türkiyə prizmasından yanaşsaq, Prezident Rəcəb Tayyip Ərdoğan dəfələrlə bəyan edib ki, Ermənistan arxivlərini açmalıdır. Türkiyə arxivlərini açıb və gizlədiləsi heç nə yoxdur. Erməni tərəfi isə hər dəfə müxtəlif bəhanələr gətirərək, nə arxivi açır, nə də müştərək tarix komissiyası yaratmaq fikrinə müsbət yanaşır. Hər şey aydındır. Həqiqət ermənilərə lazım deyil. Çünki bu, onların hər il ritual şəklində qeyd etdikləri soyqırımı bayramını dağıda bilər.

Hakimiyyəti tənqid edənlərin arasında Milli Arxiv İdarəsinin keçmiş direktoru Amatuni Virabyan da var. Virabyanın açıqlaması tənqidə yönəlsə də, bir sıra mətləblərdən xəbər verir. “Tarixçi” bildirir ki, Osmanlı imperiyası dövründə kənd və sakinlərin heç bir siyahısı olmayıb, bu səbəbdən də siyahı hazırlamaq mümkün deyil. Əslində bu fikir cəfəngiyyatdır. Türkiyə arxivlərində Anadolunun ən ucqarlarına qədər kəndlərin və yaşayan sakinlərin siyahısı mövcuddur. Virabyan eyni zamanda qeyd edib ki, gərgin iş nəticəsində 200-300 min qurbanın siyahısını hazırlamaq mümkündür. Yaxşı, o zaman sual ortaya çıxır, əgər Osmanlı imperiyasında heç bir siyahıya alınma olmayıbsa, 200-300 min erməni ilə bağlı siyahı necə hazırlanacaq? Eyni zamanda, əgər söhbət 1.5 milyon nəfərdən gedirsə, niyə birdən-birə rəqəm kəskin azalaraq 200-300 min arasında dayanır?

Göründüyü kimi, nə Paşinyanı, nə də Köçəryanı tənqid edənlərin heç bir tutarlı dəlili və əsası yoxdur. Bununla yanaşı, açıqlamaları ilə niyyətlərini büruzə verərək, soyqırımı nağılının cəfəngiyyat olduğunu bir daha sübuta yetirirlər.

24 aprel ərəfəsində hakim partiyanın elitası tərəfindən belə açıqlamaların verilməsi isə erməni dövlətinin regionda tək qaldığını, partiyadaşların, xüsusən də Paşinyanın ABŞ və Aİ tərəfindən aldadıldığını dərk etməsindən xəbər verir. Görünür, dalana dirənən baş nazir anlayır ki, yeganə çıxış yolu Türkiyə və Azərbaycanla münasibətləri normallaşdırmaqdan keçir. Bu iş üçün isə ilk addım olaraq, Türkiyənin qırmızı xətti olan qondarma soyqırımı söhbətlərini yığışdırmaq lazımdır. Türkiyə ilə münasibətləri normallaşdırmaq, Azərbaycanla da münasibətləri nizama salmaq kimi qəbul edilə bilər. Hökumət başçısının yəqin ki, əsas hədəflərindən biri Marqara körpüsünün nəhayət açılmasını təmin etməkdir. 24 aprel tarixinə isə az qalıb. Əgər Paşinyan belə bir gündə də soyqırımı kəlməsindən istifadədən imtina etsə, bu, Ankara ilə münasibətlərdə ciddi müsbət addım kimi dəyərləndirilə bilər. Bununla yanaşı, bu gün dediyini sabah təkzib edən Nikola o qədər də etibar etmək də olmaz.(Report)

"Burda həkimlər götürdükləri otağa görə pul verirlər... aylıq olaraq icarə üçün". Bu barədə dia-az.info-ya müraciət edən narazı vətəndaş bildirir ki, məhz buna görə də Bakıdakı "Aristokrat" tibb mərkəzindən qiymətlər astronomik həddədir.

"Biz həkimlərə haqq qazandırmırıq ki, qiymətlər buna görə bahadır. Həkimlər bunu bəhanə edirlər. Amma dövlət var... qanun var... Kimsə bu klinikadakı özbaşınalığa görə dövlət adına müdaxilə etməli deyilmi? Bu adamlar özbaşınadırmı?" deyən narazı vətəndaş daha sonra bildirir:

"Xəstələr də gəlir onlara pulla diş düzəltdirir. Deməli, kim qapıdan girir... hər şey burdan başlayır. Qapıdaca xəstədən 10 manat pul alırlar. Heç bilinmir həkim bu işi görə biləcək, ya bilməyəcək... 10 manat pul alırlar.

Təbii ki, xərclər tək bu deyil... Əgər dövlətin müvafiq qurumları bura müdaxilə etsə, hər şey ortaya çıxarar... Yəni bura bazardır... sağlamlığın satın alındığı.... bildiyiniz meyvə-tərəvəz bazarı..."

Abşeron rayonu, Saray qəsəbəsi, "Təzə məhəllə" sakini Rzayev Əli Hüseyn oğlu tərəfindən Hurriyyet.az saytının redaksiyasına şikayət məktubu daxil olub. Şikayətçi saytımız vasitəsilə Baş prokuror Kamran Əliyevə müraciət edir:

"Hörmətli Baş prokuror!

Yazıb sizə bildirirəm ki, mən 12 aprel 2018-ci il tarixdən 2019-cu il fevral ayının 18-ə kimi Sabirabad rayonunun Qaraqaşlı kəndində fermer iş adamı Mirzəyev Sahib Tapdıq oğlunun idarə etdiyi balıq gölündə müqavilə ilə (ayda 400 manata) işləmişəm. Əmək haqqım yetişdirdiyimiz balıqlar böyüyüb satılandan sonra ödənilməliydi. Lakin balıq məhsulu satılıb qurtarandan sonra Mirzəyev Sahib mənə çatası 400 manat pulu vermək istəmir. Məni təhqir edir, “get hara istəyirsən şikayət et” deyərək, mənə ödəniləsi olan əmək haqqımdan boyun qaçırır.

Cənab prokuror, xahiş edirəm mənə kömək edin, müvafiq qurumlara tapşırıq verin.

Qeyd edim ki, Sabirabad rayon Polis şöbəsi şikayətimə baxmadı. Polis biz vətəndaşların yanında olmalı, saxtakar insanları müdafiə etməməlidir".

Məsələ ilə bağlı Mirzəyev Sahib Tapdıq oğlunun mobil nömrələri ilə əlaqə saxladıq. Telefonu açan şəxs nömrələrin Sahib adlı şəxsə aid olmadığını bildirdi. Şikayətçi isə deyir ki, nömrələr Sahibə məxsus olsa da, özünü gizlədir.

“Expressbank”ın 2024-cü ilin I rübündə xalis mənfəəti ötən ilin müvafiq dövrü ilə müqayisədə 1,3 % azalaraq 3 milyon 396 min manat təşkil edib.

2023-cü ilin müvafiq dövründə bank 3 milyon 441 min manat xalis mənfəət əldə etmişdi.

Hesabat dövründə bankın faiz gəlirləri 21% artaraq 15 milyon 707 min manat, faiz xərcləri isə 26,9 % artaraq 4 milyon 214 min manat təşkil edib. Bu dövrdə bankın qeyri-faiz gəlirləri 4,5 milyon manata (illik müqayisədə 10,6 % az), qeyri-faiz xərcləri isə 10,9 milyon manata (illik müqayisədə 1,3% çox) bərabər olub. Beləliklə, bank bu dövrdə 5 milyon 40 min manat əməliyyat mənfəəti əldə edib ki, bu da illik müqayisədə 30 % çoxdur. Bu ilin ilk üç ayı ərzində “Ekspressbank” kiçilib. Belə ki, cari ilin aprel 1-nə bankın aktivləri ilin əvvəli ilə müqayisədə 5 % və ya 28,4 milyon manat azalaraq 531 milyon 812 min manata enib. Cari ilin ilk 3 ayında “Expressbank”ın kredit portfeli (müştərilərə verilmiş kreditlər) 2 % və ya 8,5 milyon manat artaraq 417 milyon 763 min manata çatıb.

Bankın kredit portfelində istehlak kreditləri 196 milyon manat, biznes kreditləri 115.2 milyon manat, daşınmaz əmlak kreditləri isə 106.5 milyon manat təşkil edib. Bu dövrdə “Ekspressbank”ın cəmi öhdəlikləri 398,4 milyon manat təşkil edib ki, bu da ilin əvvəlinə nisbətən 7,4 % və ya 31,8 milyon manat azdır. Şirkətlər üç ay ərzində bankdan 25 milyon manatdan çox depoziti geri çəkiblər. Belə ki, fiziki şəxslərin depozitləri ilin əvvəlinə nisbətən 3,1 % və ya 4,7 milyon manat artaraq 156 milyon 882 min manat, hüquqi şəxslərin (şirkətlərin) depozitləri isə 32,9 % və ya 25 milyon 726 min manat azalaraq 52 milyon 550 min manat təşkil edib. Bankın ümumi depozit portfeli də cari ilin ilk 3 ayında 9,1 % və ya 20,8 milyon manat azalaraq 209 milyon 432 min manata enib. 2023-cü il aprel ayının 1-nə “Ekspressbank”ın cəmi kapitalı ilin əvvəli ilə müqayisədə 2,6 % və ya 3 milyon 421 min manat artaraq 133 milyon 239 min manat təşkil edib.

Qeyd edək ki, ötən dövr ərzində ölkədə bir sıra banklar fəaliyyətini dayandırıb. Hətta ötən il onların sırasına iki bank - “GünayBank” və “Muğanbank” da əlavə olundu. Hazırda isə “Exspessbank”-da şirkətlər üç ay ərzində bankdan 25 milyon manatdan çox depoziti itirib, mənfəəti azalıbsa, adıçəkilən bank üçün təhlükə gözlənilirmi?

İqtisadçı-ekspert Əkrəm Həsənov “Cümhuriyət”-ə bildirib ki, bank üçün o qədər vəsaitin geri çəkilməsi yaxşı hal deyil:

“Ancaq burada bankın verdiyi kreditlərə də baxmaq lazımdır. Əgər prinsipcə çox kredit verməyibsə, onun üçün bu problem olmamalıdır. Çünki bəzi banklar var ki, onların əksinə, artıq izafi likvidliyi (qiymətli kağızlar ya da daşınmaz əmlakın nağda çevrilə bilmə asanlığına verilən addır) var. Yəni vəsaiti çoxdur və buna görə bilmirlər ki, o pulu neynəsinlər.

Mən öz təcrübəmdən də bilirəm ki, məhz “Exspressbank” müştərilərinə qarşı ən böyük qanunsuzluq edən banklardan biridir. “Exspressbank” müştərilərin əlindən qanunsuz olaraq əmlakını alan və sənədlər imza atdıran bir bankdır. Onsuzda “Exspressbank” heç bir zaman yaxşı bank olmayıb. Düşünmürəm ki, hazırda bank üçün təhlükə var. Ancaq o, sistemdən getsə də, sistem üçün onun mənfi yox, müsbət təsiri olacaq.

Bir faktı qeyd edim ki, bank müştərinin məlumatının olub-olmamasından istifadə edərək qanunsuz sənədlərə qol çəkdirib. Burada söhbət kifayət qədər böyük məbləğlərdən gedir.

Ümumiyyətlə, “Exspressbank” elə də yaxşı banklardan deyil. Düşünümürəm ki, təhlükə var.

Kifayət qədər müştərilərin “başına oyun açıb”, əlində xeyli miqdarda vəsait cəmləşdirən bir bankdır”.

Xaçmaz rayonu, Yeni Həyat qəsəbəsinin sakini Əliyeva Vüsalə Xanlar qızı tərəfindən Hurriyyet.az saytının redaksiyasına şikayət məktubu daxil olub. V.Əliyeva hakim qərarından şikayətçidir:

“Mən, Əliyeva Vüsalə Xanlar qızı, yazaraq bildirirəm ki, yaşadığım evin həyətyanı sahəsi faktiki olaraq 0.0458 hektardır. Şikayətim budur ki, keçmiş qonşum Cabbarov Fikrət Qismət oğlu mənə aid həyətyanı torpağımın 17.7 kv.m hissəsini zəbt edərək, qanusuz istifadə edir.

Bununla bağlı aidiyəti qurumlara müraciət etmişəm. Müraciətimə əsasən, Xaçmaz rayon Daşınmaz Əmlak Dövlət Reysteri xidməti ölçüləri alıb, çıxarışımı təsdiq edib.

Azərbaycan Respublikası Ədliyyə Nazirliyinin ekspertiza idarəsi da təsdiq edib ki, qonşu Cabbarov Fikrət Qismət oğlu mənə aid ola həyətyanı torpaqdan 17.7 kv.m hissəsini zəbt edib.

Bununla bağlı Xaçmaz rayon Məhkəməsinə müraciət etmişəm. Üç dəfə məhkəmə olub, amma qaşı tərəf iki dəfə hörmətsizlik edərə gəlməyib. Üçüncü dəfə isə heç bir sənədi olmadan, gəlib prosesdə iştirak edib. Bütün sənədlər, sübutlar mənim xeyrimə olduğu halda Xaçmaz rayon Məhkəməsinin hakimi Sərxan Səmədzadə zərərçəkmiş tərəf mən olduğum halda qarşı tərəfin xeyrinə qərar çıxarıb.

Bu qədər haqsızlıq olar? Aidiyyəti qurumlardan xahiş edirəm, bu məsələ araşdırılsın ki, hakim hansı sənədə əsasən belə qərar verib? Bu göz görə-görə özbaşınalığa, rüşvətxorluğa işarədir. Əks halda, bütün sənədlər mənim xeyrimə olduğu halda, hakim qərarı niyə belə versin?!”.

" "Umico" səytına girib məhsullara baxan kimi, zəng, mesaj gəlir ki, "moroqlondoğonoz möhsöl börödö sözö nöcö kömök ödöbölörök..." Dia-az.info bildirir ki, bunu öz etirazında Rəcəb Əlizadə adlı narazı vətəndaş ifadə edib.

Etirazçı daha sonra "Müştəriyəm Şikayətim Var" sosial qrupundakı paylaşımına belə davam edir:

"Elə bil mallarını sırımağa adam axtarırlar. Ölkədə fırıldaqçılıq o qədər artıb ki, onlayn alış-verişdə bundan daha çox istifadə edirlər.

Bilirlər ki, polis və digər qurumlar heç nə edə bilmir çox vaxt. Yazıq DİN nə qədər xəbərdarlıq etsin, hansını tutsun...

Özbaşına bir məmləkətə çevrilib bura..."

Son zamanlar Gəncə Şəhər İcra Hakimiyyətinin başçısı Niyazi Bayramov şəhər əhalisi ilə görüşlər keçirərək özünü reklam edir. Niyazi Bayramovun yarıtmaz idarəçiliyi göz qabağındadır, Gəncə şəhəri bərbad haldadır. Daş-üstünə daş qoymayan icra başçısı absurd olan tərif yazılarla nə əldə etmək istiyir bilinmir. Onun oğlunun sosial şəbəkələrdə 904 markalı maşın nömrələri rekord qırdı, amma aidiyyəti qurumlar susdu. Bununla bağlı cumhuriyyet.az bildirir ki, Gəncənin icra başçısı Niyazi Bayramovun oğlu Bəhram Bayramov bahalı avtomobilini ictimaiyyətdən gizlətmək üçün dövlət nömrə nişanını dəyişməyə əl atıb. Məlum olub ki, başçı oğlunun 10 BB 904 nömrə nişanlı “Range Rover” markalı avtomobili var. Daha sonra eyni qarajda və eyni yerdə 10 ZZ 904 nömrə nişanlı “Mercedes S Class” markalı maşın görmək olar. Bu nömrə isə əvvəl “BMW X 6” markalı maşının üstündə olub.

İcra başçısının oğluna məxsus 10-BB-904, 10-OO-904, 10-KK-904, 10-ZZ-904, 10-TT-904, 10-AS-904 nömrəli “zerkalni” qeydiyyat nişanları diqqət çəkib. Atası 1280 manat məmur maaşı alan Bayramov küllü-miqdarda vəsait tələb olunan nömrələri necə əldə edib? İcra başçısının oğlu indi həmin nömrəni çıxarıb başqa avtomobilinə qoyub. Gəncə icra başçısını oğlunun avtomobil kolleksiyasında 6 maşın var. Bu da bir məmur oğlunun hansı vəsaitlə bahalı maşınlar aldığına dair suallar doğurur. Hər halda Niyazi Bayramovun icra başçısı kimi aldığı maaş buna çatmaz. Deməli, adi korrupsiya, mənimsəmə faktının nəticəsidir. Təqdim edilən videodakı, fotolardan bəlli olur ki, avtomobillər ən bahalı brendlərin istehsal etdiyi nəqliyyat vasitələridir. Bəhram Bayramovun maşınları isə bir qayda olaraq son nömrələri 904 olan dövlət nişanları ilə “bəzədilib”. Cumhuriyyet.az

Türkiyə Respublikasının vətəndaşı Mikail Keskin Azərbaycanda ortaqları ilə qurduğu biznesdən qeyri-qanuni şəkildə məhrum edilib.

Yenicag.az-a şikayət ünvanlayan Mikail Keskinin sözlərinə görə, digər həmyerlisi Akgün Cüneyt və Azərbaycan vətəndaşı Məmmədov Rizvan Əli oğlu ilə birlikdə bərabər paylarla hüquqi ünvanı Bakı şəhəri, Cavadxan küçəsi, ev 11, m.37 olmaqla “AJDA BAKU” MMC-ni təsis edib, 30.10.2018-ci il tarixində isə qeydiyyata aldırıblar.

Daha sonra hüquqi şəxsin qanuni təmsilçisi və direktoru təyin edildiyini bildirən Mikail Keskin vurğulayıb ki, qeyd edilən hüquqi şəxs tərəfindən Bakı şəhəri, Səbail rayonu, Nigar Rəfibəyli küçəsi 20 ünvanında yerləşən ümumi sahəsi 184.6 kv.m. olan qeyri-yaşayış sahəsi icraəyə götürülüb və “AJDA BAKU” adı altında restoran fəaliyyəti həyata keçirməyə başlayıblar.

Onun sözlərinə görə, 06.07.2019-cu il tarixində özünün rəsmi qaydada məlumatı və xəbəri olmadan qanunvericiliyin tələbləri kobud şəkildə pozulmaqla “AJDA BAKU” MMC-nin təsisçilərinin iclası keçirilib və hüquqi şəxsin direktoru vəzifəsinin Ayvazov Vəli Nizaməddin oğluna həvalə edilməsi qərara alınıb. Qanunvericiliyin kobud şəkildə pozulması davam etdirilərək 23.08.2019-cu il tarixdə yenidən “AJDA BAKU” MMC-nin təsisçilərinin iclası Keskinə rəsmi qaydada məlumat və xəbər verilmədən keçirilib və hüquqi şəxsin direktoru olaraq Məmmədov Rizvan Əli oğlu təyin edilib. Bütün bunlarla yanaşı, Məmmədov Rizvan Əli oğlu qanun pozuntuları davam etdirib və 07.05.2020-ci il tarixində yenidən Mikail Keskinə rəsmi qaydada xəbər vermədən “AJDA BAKU” MMC-nin təsisçilərinin ümumi yığıncağını keçirib. İclasda digər təsisçi Cüneyt Akgünə aid iştirak payının satın alınması barədə qərar qəbul edilib.

“Halbuki qanunvericiliyin tələblərinə uyğun olaraq Cüneyt Akgünün payının satın alınması mənə də təklif edilməli idi. Mənə rəsmi məlumat və xəbər vermədən hüquq və mənafelərim pozulmuş, eyni zamanda, dövlətin xarici investorların ölkəmizə cəlb edilməsi sahəsində maraqlarına, həmçinin mənim şəxsimdə Azərbaycan-Türkiyə arasında mövcud olan möhkəm qardaşlıq münasibətlərinə xələl gətirən hərəkətlərə yol verilmişdir. Həmçinin Cüneyt Akgünə məxsus payın alınması ilə bağlı aidiyyəti şəxslərlə əqdlərin bağlanması qaydaları Məmmədov Rizvan Əli oğlu tərəfindən pozulmuşdur. Belə ki, bunula bağlı digər təsisçi kimi mənə məlumat verilməmiş və mənim payın alınmasından imtinam olmadan pay Məmmədov Rizvan Əli oğlu tərəfindən satın alınmışdır.
Əlavə olaraq bildirirəm ki, Məmmədov Rizvan Əli oğlu “Ajda Baku” MMC-nin qanuni təmsilçisi və direktoru olduğu vaxtdan etibarən hüquqi şəxsin fəaliyyəti ilə bağlı vergiləri və digər icbari ödənişləri ödəməkdən qəsdən yayınmışdır. Bu faktlarımı təsdiq edəcək mötəbər sənəd kimi İqtisadiyyat Nazirliyi yanında Dövlət Vergi Xidmətinin Bakı şəhəri, Lokal Gəlirlər Baş İdarəsi tərəfindən mənə ünvanlanmış məktub da var. Həmçinin qeyd etmək istəyirəm ki, Məmmədov Rizvan Əli oğlunun təsviri hissədə qeyd etdiyim qanunsuz hərkətlərinmin vaxtında aşkar olunmaması fəaliyyətə vergi orqanının aidiyyəti əməkdaşları tərəfindən səhlənkarlığa yol verilməsi nəticəsində baş verməsi xüsusatları da mütləq qaydada araşdırılmalıdır”, – deyə Keskin bildirib.

Mikail Keskin vurğulayıb ki, Rizvan Məmmədov qardaşı, Naxçıvan Muxtar Respublikasının keçmiş təhsil naziri Rəhman Məmmədovla bilrikdə onu təhdid edir. Məmmədov qardaşlarının təhdidlərinə dair sübutların olduğunu qeyd edən iş adamı Rizvan Məmmədovun 8 məhkəmə iclası keçirilməsinə baxmayaraq, heç bir iclasda iştirak etmədiyini və məhkəməyə açıq-aşkar şəkildə hörmətsizlik nümayiş etdirdiyini xüsusilə bildirib.

İş adamı onu da qeyd edib ki, Bakı Kommersiya Məhkəməsinin hakimi Zeynəb Axundova işi qəsdən uzadaraq qarşı tərəfin mənafeyini güdəcək şəkildə prosesi yönləndirir. “Rizvan Məmmədov mənə bildirdi ki, sənə verəcəyim pulu məhkəməyə verib işi qazanaram”, – deyən Mikail Keskin prosesin uzanmasının və hakimin tərəfkeşlik etməsinin təsadüf ola biləcəyinə inanmadığını deyib.
Ölkə başçısı İlham Əliyevin hüquq sistemindəki islahatlarının davamı olaraq Ali Məhkəməyə yeni sədr təyin etməsinin əhəmiyyətinə də toxunan Mikail Keskin hər şeyə rəğmən, Azərbaycanın hüquq sisteminə güvəndiyini xüsusilə vurğulayıb və İnam Kərimovun bu problemi ədalətli şəkildə həll edəcəyinə inandığını bildirib.

İş adamı son olaraq onun barəsində veriləcək qərarın Azərbaycana yatırım etmək istəyən xarici investorların qərarına ciddi təsir edəcəyini söyləyib.