Beyrutda olan HƏMAS hərbi rəhbərlərinin əksəriyyəti sui-qəsd cəhdlərinin hədəfi olmaq qorxusundan Livanın paytaxtını tərk edib.

Bu barədə İsrailin KAN radiostansiyası məlumat yayıb.

Bildirilib ki, HƏMAS Saleh Arurinin məqsədyönlü şəkildə öldürülməsindən sonra liderlərinin təhlükəsizliyini təmin etmək üçün mühüm tədbirlər görüb.

Belə ki, HƏMAS rəsmiləri Livanı tərk edərək Suriya və Türkiyəyə gediblər. Bundan əlavə, qruplaşmanın yüksək səviyyəli lideri Qazi Həmədin Qətərə qaçdığı və Arurinin öldürülməsindən sonra Livana qayıtmadığı bildirilir.

Qeyd edək ki, HƏMAS-ın iki nömrəli lideri Aruri ən azı beş nəfərlə birlikdə Beyrutun cənubunda İsrailin pilotsuz təyyarəsinin endirdiyi zərbə nəticəsində öldürülüb.

1995-ci ildə qəbul olunmuş Azərbaycan Respublikası Konstitusiyasının 7-ci maddəsinin I hissəsində qeyd olunub ki, Azərbaycan dövləti demokratik, hüquqi, dünyəvi və unitar bir dövlətdir. Bu hüquqi dövlət hüquqla, qanunla idarəetmədə qaydaların hökmranlığı ilə sıx bağlı olan, fəaliyyəti və quruluşu xalqın iradəsinə uyğun gələn, insan hüquq və azadlığının müdafiə olunduğu bir dövlət tipidir. Hüquqi dövlətin sosial əsası özünütənzimləyən vətəndaş cəmiyyətidir və bu dövlət vətəndaş cəmiyyətinin forması kimi çıxış edir. Bu tip dövlətlərin mərkəzində insan və onun maraqlarının müdafiə olunması daim öndə tutulur. Faktdır ki, Azərbaycan dövləti daxili məsələlərin həllində hüquqa, qanuna əsaslanır və hüquqi-demokratik dövlətlərdə konstitusiya qanunları hüquqi baza kimi ictimai həyatın bütün sahələrini əhatə edir. Bu belə olduğu halda, görəsən bu gün ölkəmizin hər sahəsində hüquq və onun aliliyini uca tutulur, yoxsa tapdaqlar altına atılır?. Belə bir məsələlərlə bağlı az-çox məlumat əldə etmək üçün, heç də uzağa getmək lazım deyil. Yəni, Bakı şəhəri, Binəqədi rayonu, Biləcəri qəsəbəsi, Ordubadi küçəsi, döngə-3, mən-140 ünvanında ailəlikcə yaşayan Paşayev Koroğlu Abdulla oğlunun və bu şəxsin ailə üzvlərinin 2017-ci ildən üzüzə qaldıqları məşəqqətlər haqda məlumatları əldə etmək, məhz hər kəsin ümumi durum haqqında lazımi məlumatları əldə etməsinə imkan verəcək. Məsələn, bu günlərdə gundemxeber.az xəbər portalının redaksiyasına Koroğlu Paşayev tərəfindən müraciət daxil olub. Bu şəxs müraciətində qeyd edir ki, “Biz 2011-ci ildən Binəqədi rayonu, Biləcəri qəsəbəsi, Ordubadi küçəsi, döngə-3, mən-140 ünvanında ailəlikcə yaşayırıq. Buna baxmayaraq, 2017-ci ildə Hacı Ramazan adlı şəxsin rəhbərlik etdiyi “Məmmədoğulları” MMC-nin əməkdaşları 35 000 klv -luq elektrik trosfarmatorunu yaşadığımız evin pəncərəsindən iki metr aralı məsafədə quraşdırdılar. Onlar atdıqları belə bir addımları ilə, birbaşa bizim ailəni olmazın dərdə saldılar. Çünki, həmin trosfarmatorun ətrafa buraxdığı elektrik şüalarının təsirindən, ailə üzvlərimizin hər birinin səhhətində ciddi problemlər əmələ gəlməyə başladı. Bununla bağlı aidiyyəti üzrə dövlət qurumlarına müraciətlər etsək də, bir kimsə bizim müraciətimizə əhəmiyyət vermədi. Bu gün bizim aidiyyəti dövlət qurumlarından xahişimiz və əsas tələbimiz ondan ibarətdir ki, trosfarmatorun yerini 50 m aralı məsafəyə dəyişdirsinlər. Faktdır ki, elektrik trosfarmatorunun ətrafa buraxdığı elektrik şüaları, ailə üzvlərimizin hər birində, ələlxüsus həyat yoldaşımda ürək xəstəlikləri yaradıb. Belə bir səbəbdən də, xeyli vaxtdır ki, yaşadığımız mənzili satıb köçmək istəyirik. Evimizi almaq istəyən şəxslər isə, yaşadığımız mənzilin pəncərəsindən iki mert aralı məsafədə yerləşən elektrik trosfarmatorunu görən kimi, məhz onlar bu yöndə fikirlərindən “vaz keçirlər”.

Qeyd edim ki, yaşadığımız evi 2011-ci ildə Hacı Ramazanın qardaşı Hacı İbrahimdən almışıq. “Məmmədoğulları” MMC-nin quraşdırdığı 35 min klv-luq elektrik trosfarmatorunda ötən illər ərzində bir neçə dəfə şiddətli partlayışlar baş verib. Partlayışlar daha çox yağmurlu günlərdə baş verir ki, bu da olduqca qorxulu anların yaşanmasına səbəb olur. Faktdır ki, Hacı Ramazanın bacısı qızıgil bizimlə qonşu idilər və onlar baş verən partlayışlardan ehtiyat edərək yaşadıqları evi satıb bu ünvandan köçdülər. Onu da bildirim ki, “Məmmədoğulları” MMC əməkdaşları elektrik trosfarmatorunu yaşadığımız evin pəncərəsindən iki metr aralı məsafədə quraşdırarkən, biz onların belə bir hərəkətinə qəti etirazımızı bildirdik. Həmin vaxtlarda MMC-nin əməkdaşları bizə “Hacı Ramazan tapşırıq verib, trosfarmatoru 20 gündən sonra o tərəfdə quraşdıracağıq” deyə vəd verdilər. Təəssüflər olsun ki, onlar belə bir fırıldaq əməlləri ilə bizi aldatmağı bacardılar. Belə bir problemlə bağlı “Azərişıq” ASC-nə müraciət etsəm də, bu yöndə də etdiyim müraciətin heç bir nəticəsi olmadı. Yəni, “Azərişıq” ASC-nin rəsmi şəxsləri mənə MMC-nin rəhbəri Hacı Ramazanla danışıb-barışmağı, bir sözlə problemin aradan qaldırılması üçün yalnız bu şəxslə danışıqlar aparmağı məsləhət gördülər. Artıq vəziyyət elə bir həddə gəlib çatıb ki, bu gün ölkə rəhbəri İlham Əliyev cənablarına müraciət etmək məcburiyyətində qalmışam. Çünki, himayəmdə dörd azyaşlı övladım var və pəncərəmizdən iki metr aralı məsafədə quraşdırılmış 35 min klv-luq elektrik trosfarmatorunun ətrafa buraxdığı elektrik şüaları, bu gün övladlarımın da səhhətinə ciddi təsir edir. Faktdır ki, onlar böyüdükcə olmazın problemlərlə üzüzə qalacaqlar”.
Bəli, gundemxeber.az xəbər portalı olaraq redaksiyamıza daxil olan belə bir müraciət əsasında qeyd olunan ərazidə olduq və müraciət müəllifi Koroğlu Paşayevin qeyd etdiyi faktın doğruluğunu gözlərimizlə gördük. Ümidvarıq ki, müraciət müəllifinin İlham Əliyev cənablarına ünvanladığı müraciəti, ölkə rəhbərinə etdiyi xahiş “Azərişıq” ASC-nin sədri cənab Vüqar Əhmədov və “Məmmədoğulları” MMC-nin rəhbəri Hacı Ramazan tərəfindən diqqətdə saxlanacaq və altı nəfərdən ibarət bir ailənin üzüzə qaldığı problem qısa zaman kəsiyində aradan qaldırılacaq. Əgər problemin aradan qaldırılmasına cavabdehlik daşıyanlar bundan sonra da sayğısızlıq göstərməkdə davam edərlərsə, o halda bunu təkcə Koroğlu Paşayevin özünə və ailə üzvlərinə qarşı sayğısızlıq kimi deyil, eyni zamanda vətəndaşın ölkə rəhbərinə ünvanladığı müraciətə də sayğısızlıq kimi dəyərləndirilməlidir. Qeyd olunanlarla bağlı qarşı tərəfin də mövqeyini dinləməyə hazırıq.(Gundemxeber)
Mövzuya qayıdacağıq.

"Möhtərəm Prezident! Sizə, Azərbaycanın dövlətçiliyinə və ölkəmizin beynəlxalq imicinə böyük ziyan vura biləcək bir məsələ haqqında məlumat bildirməyi özümüzə borc bilirik. Belə ki, 25 noyabr 2023-cü il tarixində AR Kənd Təsərrüfatı naziri M.Məmmədov və AR Qida Təhlükəsizliyi Agentliyinin sədri Q.Təhməzli tərəfindən AR İqtisadiyyat naziri M. Cabbarova müraciət məktubu göndərilmişdir. Bu müraciətin mahiyyəti və məqsədi “Ekoloji təmiz kənd təsərrüfatı haqqında” Azərbaycan Respublikasının Qanununun ləğv edilməsi və “Qida təhlükəsizliyi haqqında” Azərbaycan Respublikasının Qanununda dəyişiklik edilməsi barədə “Azərbaycan Respublikasının Qanunu” layihəsi haqqındadır. Bununla əlaqədar Sizə AMEA-nın Ekoloji Təmiz Kənd Təsərrüfatı üzrə Regional Təcrübə və Resurs Mərkəzinin kollektivinin rəyini təqdim edirik". Bu barədə AMEA-nın Ekoloji Təmiz Kənd Təsərrüfatı üzrə Regional Təcrübə və Resurs Mərkəzi kollektivinin Prezident İlham Əliyevə ünvanlanmış müraciətində deyilir.
Müraciətdə daha sonra deyilir: "Bu rəy Azərbaycanda ekoloji təmiz kənd təsərrüfatının və aqrar elmin mövcud vəziyyətinin real qiymətləndirilməsi istiqamətində lazımi təhlillər aparıldıqdan, dünya təcrübəsi öyrənildikdən sonra nəzəri-fundamental və tətbiqi-innovativ tədqiqatların optimal strukturunu, orta və uzunmüddətli prioritetlərini və inkişaf pespektivlərini, bunların reallaşması üçün müvafiq elm və təhsil müəssisələrinin əsas vəzifələrini, yeni idarəetmə və koordinasiya sisteminin konturlarını müəyyənləşdirən istiqamətləri nəzərə alaraq hazırlanmışdır.
Yuxarıda adı çəkilən qanun layihəsi ölkə ictimaiyyəti, azərbaycan alimləri və peşəkar mütəxəssisləri, digər aidiyyatı dövlət qurumları (Azərbaycan Milli Elmlər Akademiyası, Ekologiya və Təbii Sərvətlər Nazirliyi, Elm və Təhsil Nazirliyi, Bakı Dövlət Universiteti, Azərbaycan Dövlət Aqrar Universiteti, Azərbaycan Respublikasının Prezidenti Yanında Dövlət İdarəçilik Akademiyası və s.) tərəfindən müzakirə edilmədən, yalnız bu təşəbbüsü irəli sürən mərkəzi icra hakimiyyəti orqanları olan Azərbaycan Respublikası Kənd Təsərrüfatı Nazirliyinin və Azərbaycan Qida Təhlükəsizliyi Agentliyinin 4 (dörd) nəfər əməkdaşı tərəfindən hazırlanıb.
Sizə məlumat olaraq bildiririk ki, dünyanın 190-dan artıq ölkəsində bu ölkələrin qanunvericilik bazasının əsasında ekoloji(orqanik) kənd təsərrüfatı sistemi inkişaf etdirilir. Bu proses bütün ölkələrdə İFOAM (Beynəlxalq Orqanik Kənd Təsərrüfatı Hərəkatı Federasiyası) tərəfindən idarə olunur və Azərbaycan dövləti İFOAM-ın baza standartlarının əks olunduğu bütün beynəlxalq konvensiyalara qoşulmuşdur.
Azərbaycan Ekoloji Təmiz Kənd Təsərrüfatı haqqında 2008-ci ildə Qanun qəbul edildikdən sonra MDB ölkələri cərgəsində 1-ci, dünya ölkələri içərisində sonuncu onluq arasındadır.
Azərbaycanda ekoloji kənd təsərrüfatının inkişaf etdirilməsi ideyası 1996-cı ildə Gəncədə doğulmuşdur. Məqsəd xırda və pərakəndə torpaq istifadəçiliyi və eyni zamanda torpaq payı alan insanların texniki və maliyyə imkanlarının məhdud olduğu şəraitdə onlara ata-baba, yəni ekoloji kənd təsərrüfatı istiqamətində vərdiş və bacarıqlar aşılamaq idi. Beləliklə, 1996-cı ildə Azərbaycan Dövlət Aqrar Universitetində, Gəncədə yerləşən Elmi-Tədqiqat İnstitutlarında çalışan və özlərinin yüksək vətənpərvərlik ruhu, əqidə birliyi, vətəndaşlıq borcu və peşəkarlıq sevgisi ilə birləşən bir qrup alimlərin və onlara həmin amallar fonunda qoşulan könüllülər birlikdə ölkədə Ekoloji Kənd Təsərrüfatı Hərəkatının əsasını qoydular. Sonrakı mərhələdə bir neçə il dünyada müxtəlif ölkələrdə mövcud olan ekoloji təmiz əkinçilik qanunvericiliyi öyrənildikdən sonra 2005-ci ildə Azərbaycan Kənd Təsərrüfatı Akademiyasının (AKTA-indi Azərbaycan Dövlət Aqrar Universiteti) professoru A.Babayevin rəhbərliyi altında AKTA və Gəncə Aqrobiznes Assosiyasiyasını (GABA) təmsil edən ekspertlər qrupu «Ekoloji Kənd Təsərrüfatı haqqında Qanun» layihəsini işləyib hazırladılar. Bu layihə ictimai rəyi öyrənmək məqsədilə mərkəzi və regional mətbuat orqanlarında çap edildikdən sonra Milli Məclisə və respublikanın müvafiq nazirliklərinə təqdim edildi. Qanun layihəsi yalnız 2007-ci ilin aprel ayında ölkə parlamentinin Aqrar Siyasət Komissiyasında müzakirə mövzusuna çevrildi və prof. A.Babayev İşçi Komissiyanın tərkibində qanun layihəsinin müzakirəsi və redaktəsi prosesində iştirak etdi. Qanun Milli Məclisdə 2008-ci ildə qəbul olundu və ölkə Prezidentinin 25 avqust 2008-ci il tarixli fərmanı ilə qüvvəyə mindi.

Qanun qəbul olunduqdan 10 il sonra FAO ölkəmizdə bu qanunla əlaqədar islahatların çox ləng getdiyini nəzərə alaraq hökümətlə apardığı danışıqlardan sonra “GCP/AZE/006/TUR: Azərbaycanda ekoloji təmiz kənd təsərrüfatının inkişafı və institusional bacarıqların artırılması” layihəsini icra etdi və lahiyənin yerinə yetirilməsinə xeyli maliyyə xərcləndi. Bu layihənin əsas hədəfləri Azərbaycanda orqanik kənd təsərrüfatının inkişafına təkan vermək, bu sahədə mövcud qanunvericiliyin, hüquqi bazanın formalaşdırılmasının, müvafiq milli strategiyanın hazırlanmasından ibarət idi. Layihə çərçivəsində hazırlanan hüquqi aktlar və tövsiyyələr Azərbaycan hökümətinə təqdim olundu.

9 iyul 2019-cu il tarixində Sizin göstərişinizlə AR Prezidenti Administrasiyası rəhbərliyi Respublikanın Mərkəzi İcra Orqanlarına monitorinq keçirmək məqsədilə ekoloji təmiz kənd təsərrüfatı haqqında qanunvericiliyin icra vəziyyətinin yoxlanılması ilə əlaqədar zəruri məlumatları Azərbaycan Respublikası Prezidentinin Administrasiyasına təqdim etmələri haqda məktub göndərdi (məktub nömrəsi 2/795). Monitorinqin nəticələrinə görə məlum oldu ki, ölkə qanununun və Prezidentin Fərmanlarının yerinə yetirilməsi istiqamətində görülən işlər qeyri-qənaətbəxşdir. Yalnız Azərbaycan Respublikasının Prezidenti İ.Əliyevin 25 avqust 2008-ci il tarixli 818 №-li və 24 may 2010-cu il tarixli 267 №-li Fərmanlarını və 2010-cu il tarixli 159 nömrəli qərarlarını əsas tutaraq yaradılan (AMEA-nın Rəyasət Heyətinin 25 may 2016-ci il tarixli 8/5 nömrəli qərarı ilə) AMEA-nın Ekoloji Təmiz Kənd Təsərrüfatı üzrə Regional Təcrübə və Resurs Mərkəzinin (“Mərkəz”) gördüyü işlər məqbul hesab olundu. Qeyd etmək lazımdır ki, bu “Mərkəz”-in fəaliyyəti sayəsində regionun 2 rayonunda (Qax, Zaqatala) ekoloji təmiz kənd təsərrüfatı üzrə təlim və seminarlarda iştirak edən 1000-ə qədər fermerdən 500-ü və yaxud 50 fermer qrupunun Avropanın Akkreditasiya Orqanları tərəfindən sertifikatlaşdırılması Azərbaycanda ilk hadisədir və bunu “Mərkəz”in qısa müddət ərzində fəaliyyətinin önəmli nəticəsi kimi qəbul etmək olar. Orqanik fermer statusu alan fermerlərin Avropa Akkreditasiya orqanlarına ödəməli olan rüsumu (bizim fermerlərin ödəniş qabiliyyəti zəif olduğuna görə (qiyməti 4000 (dörd min) avro olduğunu nəzərə alsaq) IFOAM (Beynəlxalq Ekoloji Kənd Təsərrüfatı Hərəkatı Federasiyası) ödənişi öz üzərinə götürmüşdür. Beləliklə orqanik sertifikatlaşma prosesinə ödənilməli olan rüsumun ümumi məbləğ 200 (iki yüz) min avro olmuşdur.

Lakin təəssüflər olsun ki, qanunun təkmilləşdirilməsi haqqında FAO-nun təklif və tövsiyyələri yerinə yetirilmədi. Bunun əksinə olaraq, bu sahəyə cavabdeh olan bəzi orqanlar məsuliyyətdən gələcəkdə yaxa qurtarmaq üçün birdəfəlik Qanunu ləğv etdirmək qərarına gəliblər. Eyni zamanda təqdim etdikləri layihədə orqanik məhsulların sertifikatlaşdırılması ilə əlaqədar bütün səlahiyyətlər Qida Təhlükəsizliyi Agentliyinə verilməklə aidiyyatı olan digər mərkəzi icra orqanlarının səlahiyyətlərinə müdaxilə olunur. Halbuki, dünyanın bütün ölkələrində orqanik məhsulların sertifikatlaşdırılması bu ölkələrin Milli Standartlarına əsaslanaraq yerinə yetirilir. “Azərbaycanın Milli Standartları” bizim tərəfimizdən işlənib hazırlanaraq 2016-cı ildə Azərbaycan Standartlar Komitəsinə təqdim olunmuşdur və bu standartlar Azərbaycan Standartlaşma İnstitutu tərəfindən hüquqi sənəd formasına salınsa da, hələ də burokratik əngəllər ucbatından qəbul olunmayıb.
Belə olan halda sual olunur ki, Qida Təhlükəsizliyi Agentliyinin ölkənin standartları ilə məşğul olan bir orqanın səlahiyyətlərinə müdaxilə edərək öz üzərinə götürməkdə məqsədi nədir? Digər tərəfdən “Qanun boşluğu” yarandığı halda ölkədə orqanik məhsul istehsalını kim və hansı səlahiyyətlərlə təşkil etməlidir və yaxud ölkədə orqanik məhsul istehsalçısının və orqanik məhsulun olmadığı halda Qida Təhlükəsizliyi Agentliyi kimi və nəyi sertifikatlaşdıracaq?
Aşağıda qeyd etdiyimiz əsas motivlərə əsaslanaraq bildiririk ki, “Ekoloji təmiz kənd təsərrüfatı haqqında” Azərbaycan Respublikasının Qanununun ləğvi ölkəmizin ictimai mühitində və beynəlxalq aləmdə dövlətimizə qarşı mənfi rəy yarada bilər:

1. Mövcud Qanuna qarşı olan qeyri-dövləti münasibət hal-hazırda qüvvədə olan “Azərbaycanda ekoloji cəhətdən dayaynıqlı sosial-iqtisadi inkişafa dair Milli Peoqram”-in mahiyyəti ilə ziddiyyət yaradır və 4.1 - Su ehtiyatları, 4.2 - Atmosfer havası, 4.3 – Torpaq ehtiyatları, 5.1 – İqlim dəyişmələri, 5.2 – Səhralaşmaya qarşı mübarizə, 5.3 – Bioloji müxtəliflik maddələrində göstərilən strateji məqsədləri inkar etmək və qarşımıza qoyulan vəzifələrdən boyun qaçırmaq mənasını yaradır. .

2. Qanunda qeyd olunan “Ekoloji kənd təsərrüfatı haqqında qanunvericiliyin məqsədi”, 4-cü maddədə qeyd olunan “Ekoloji kənd təsərrüfatının ümumi prinsipləri”, 5-ci maddədə “Ekoloji təmiz kənd təsərrüfatının dövlət tənzimləməsi”, 6-cı maddədə “Ekoloji təm kənd təsərrüfatına dair tələblər”, 7-ci maddədə “Bitkiçilikdə tətbiq olunan ekoloji tələblər”, 8-ci maddədə “Heyvandarlıqda tətbiq olunan ekoloji tələblər”,9-cu maddədə “Ekoloji təmiz kənd təsərrüfatı cubyektlərinin təşkil qaydaları”, 10-cu maddədə “Ekoloji təmiz kənd təsərrüfatına keçid dövrü” müddəalarında, eyni zamanda Qanunun 3-cü, 4-cü, 5-ci və 6-cı fəsillərdə qeyd olunmuş bütün maddələri ləğv etmək o deməkdir ki, Azərbaycan hökuməti Qanun işlənib hazırlanan zaman əsas kimi qeyd etdiyi İFOAM-ın Baza Standartlarından, BMT-nin davamlı inkişaf haqqında “XXI əsrin gündəliyi ” direktivlərindən, Avropa İttifaqının 2092/91 saylı Qətnaməsindən, Avropa İttifaqının Aqrar – Ekoloji Proqramından , Avropa Şurasının CAP- Ümumi Kənd Təsərrüfatı adlı tədbirlər Planından və Avropa Birliyinin bütün ölkələri üçün əsas kimi qəbul edilən “Avropa Birliyinin Ümumi Kənd Təsərrüfatı Siyasəti”-nin prinsiplərindən Avropa İttifaqının 834/2007 nömrəli qətnaməsindən imtina edir.

3. Nəzərə alınmır ki, Azərbaycan dünyada qloballaşma şəraitində davamlı inkişafın prinsiplərini rəhbər tutaraq qoşulduğu “Monreal protokolu”(Monreal,1987), “Kioto protokolu”(Kioto,1997), “Orxus konvensiyası”(1998), “XXI əsrin Gündəliyi” qətnaməsi(Rio-De-Janeyro,1992), Yohannersbuqda Dünya sammitində qəbul edilən deklorasiya (Yohannesburq, 2002), “Avropanın Ətraf Mühiti” konfransının bəyanatı (Kiyev, 2003) və digər beynəlxalq aktlarda qeyd olunur ki, heç bir ölkənin davamlı inkişafı əhalinin, torpağın, suyun, bitkilərin və heyvanları sağlamlığını və təhlükəsizliyini təmin edən siyasətin həyata keçirildiyi şəraitdə mümkündür. Bu müddəalar Ekoloji Təmiz Kənd Təsərrüfatı haqqında Azərbaycan Respublikasının Qanununda əsas məqsəd kimi qarşıya qoyulmuşdur!

4. Azərbaycanın 2024-cü ildə BMT-nin iqlim dəyişiklikləri üzrə Cenevrə Konvensiyasının Tərəflər Konfransında 29-cu sessiyasına (COP29) ev sahibliyi edəcək bir ərəfədə bu mövcud Qanunun ləğv edilməsi faktı konfrans iştirakçılarının, o cümlədən İFOAM-dan olan nümayəndə heyətinin ciddi iradlar yaradacaq sürpriz ola bilər.


5. Ekoloji Təmiz Kənd Təsərrüfatı üzrə Azərbaycan Respublikasının Qanununun ləğv edilməsi üçün əsas kimi “Azərbaycan Respublikasının kənd təsərrüfatı məhsullarının istehsalına və emalına dair Strateji Yol Xəritəsi ”nə istinad olunmasını təşəbbüskarların yanlış addımı kimi qəbul edirik. Çünki Strateji Yol Xəritəsi dövri sənəddir(yəni 2025-ci ilə qədərki dövrü əhatə edir) və “ Yol Xəritəsi”ndə qeyd olunan “7.4. Ekoloji Təmiz Kənd Təsərrüfatının inkişaf etdirilməsi”prioriteti bizim adını çəkdiyimiz Qanun əsasında işlənib hazırlanmışdır. Yol Xəritəsi və planlardan fərqli olaraq qanunların ömrü 50-100 il ola bilər.

Müraciətimizin sonunda bildirmək istərdik ki, biz, bir qrup mütəxəssis çiyinlərimizdə daşıdığımız vətəndaşlıq ruhu ilə 1996-ci ildən bəri ötən dövr ərzində könüllü olaraq heç bir təmanna güdmədən və hətta dövlətin bir manat vəsaitinə şərik çıxmadan, böyük zəhmət və əziyyətlə müasir dünyada həm elmi, həm də praktiki nou-xau kimi qimətləndirilən ekoloji(orqanik)kənd təsərrüfatının ölkəmizdə elmi, elmi-metodiki, elmi-informasiya bazasını yaratmağa nail olmaqla yanaşı dövlətimizin hüquqi qanunvericilik bazası üçün strateji əhəmiyyət kəsb edən hüquqi sənədlərini də işləyib hazırlayaraq ali dövlət orqanlarına təqdim etmişik:

1. “Ekoloji Təmiz Kənd Təsərrüfatı haqqında” Azərbaycan Respublikasının Qanunu ilə bağlı bəzi normativ hüquqi aktlar (8 Qaydalar AR Nazirlər Kabinetinin 2009-cu il 8 yanvar tarixli 5 nömrəli qərarı ilə təsdiq edilmişdir).
2. Milli Standartlar (işlənib hazırlandıqdan sonra 2016-ci ildə Dövlət Standartlar Komitəsinə təqdim olunub).
3. Milli Konsepsiya (2016-ci ildə AMEA-nın Rəyasət Heyətində müzakirə edilərək onun əsasında Dövlət Proqramı işlənib hazırlanmışdır).
4. Dövlət Proqramı (2016-ci ildə AMEA-nın Rəyasət Heyətində müzakirə edildikdən sonra AR Nazirlər Kabinetinə təqdim olunub).
5. Kənd Təsərrüfatı Məhsullarının İstehsalı və Emalı üzrə Strateji Yol Xəritəsi (7.7.4. Prioritet 7.4. Ekoloji təmiz kənd təsərrüfatı istehsalının inkişaf etdirilməsi)

Möhtərəm Prezident!
Diqqətinizə görə təşəkkür edirik. Əgər burokratik səbəblər ucbatından bizim müraciətimiz Sizə çatdırılmazsa, biz çalışacağıq ki, bu müraciəti sosial şəbəkə vasitəsi ilə Sizə təqdim edək!"
dia-az.info

"Şikayətim "Dr.Milk"dən... daha dəqiqi, onun istehsal etdiyi dovğadandır". Bu barədə "Şikayətim Var" sosial qrupundakı paylaşımda giley olunur.

Narazı vətəndaş daha sonra yazır: "Özlərinə zəng çatmadığı üçün bu qrupa yazdım.

Aldığım dovğa görün, nə haldadır..."

dia-az.info

""Starex" karqo şirkətindən alış-veriş etməməyinizi tövsiyə edirəm. Bağlama gecikməsinə görə yaranan problemdə şikayətim gecikmədən çox, işçilərin məsuliyyətsizliyi, özbaşnalığı və yalan danışmağına görədir". Bu barədə Elvin Kərimov adlı istifadəçi "Şikayətim Var" sosial qrupunda giley edir.

Müştərilər rəsmən boğaza yığılıb...

"Yaradılan müraciətin müştərinin rəyi olmadan bağlanılması, telefon danışığı zamanı müştəri sözünü bitirmədən dəstəyin asılması, yalan danışmaq və s. kimi misallar bura daxildir..."

dia-az.info

Dünyada xərçəngdən ölənlərin sayı kəskin dərəcədə artıb. Ümumdünya Səhiyyə Təşkilatı bildirir ki, hər il 14 milyondan artıq insana xərçəng diaqnozu qoyulur və bunlarınyarıdan çoxu ölür. Bir müddət öncə millət vəkili Faziil Mustafa da bu problemə toxunmuşdu. Fazil bəyin çıxışını dinləyənlər arasında yəqin ki, Milli Məclisinin deputatı, parlamenin Səhiyyə Komitəsinin üzvü Kamaləddin Qafarov da olub. Bu şəxsi xüsusi olaraq ona görə qeyd edirik ki, cənab Qafarov “seçkili” vəzifə ilə bərabər həm də təyinatlı vəzifə sahibidir: o, Milli Onkologiya Mərkəzinin Baş direktoru Cəmil Əliyevin müavinidir. Bununla da yekunlaşmır. 9 saylı Binəqədi ikinci seçki dairəsinin mandatını qalmaqalı seçki prosesindən sonra ələ keçirən Kamaləddin Qafarov həmçinin sahibkarlıq fəaliyyəti ilə məşğuldur və bu sahibkarlıq birbaşa dərman sənayesi ilə bağlıdır. Yəni Fazil Mustafanın sözlərindən dərs çıxarmalı şəxs Kamaləddin Qafarov olmalı idi…
Cəmil Əliyevin etimadını biznesə çevirən müavin
Ölkə mediasında yer alan iddialar onu göstərir ki, Respublika Milli Onkologiya Mərkəzi xəstələrə açıq bazar prinsipi ilə yanaşır və istədikləri qiyməti tətbiq edirlər. Bu tibb müəsisəsində”pul tələb etmə” elə qapıdan girən kimi başlayır. Deputatın rəhbərliyi altında Milli Onkologiya Mərkəzində formalaşan bazar qiymətlərini cumhuriyyet.az olaraq diqqətinizə çatdırırıq:
1. Onkoloji xəstəlik şübhəsi yarananda ilk müraciət etdikdə müayinə üçün cürbəcür adlarla 500 manata yaxın pul verməli olurlar.
2. Kimyaterapiya keçmək üçün müayinə sənədlərini müalicə edəcək həkimə çatdırılması insanların özlərinə qadağandır. Həmin müayinə kağızlarını bir korpusdan başqasına aparmaq üçün əməkdaşlara 20 manat verilməlidir.
3. Kimyaterapiya 300 manatdır. Bundan əvvəl də bəzi müayinələri keçmək üçün 60 manatdan 100 manata qədər də pul ödənməlidirr. Xərçəng xəstələri hər 21 gündən bir kimyaterapiya qəbul etməlidirlər və hər dəfə də eyni pulları verməlidirlər.
4. Bəzi xəstələrin şüa da qəbul etməsi qaçılmazdır. Onun da 28 seansı 1000 manatdır.
5. Qan analizi, UZİ, kardeoqrammanın qiyməti 20 manat olaraq müəyyənləşib.
Bu mərkəzin bir tibb ocağı olaraq ağır durumda olan və yaşamaq şansı daha az olan xəstələrə qarşı həssas və qayğı ilə yanaşmaqdansa, həyasızcasına vicdanını pula sataraq xəstələrdən rüşvət tələb etməsi ağlasığmaz cinayət əməlidir.
Milli Onkologiya Mərkəzinin Baş direktoru Cəmil Əliyev ölkə başçısının xalası oğludur, öz müavininə etibar edir və inanır. Direktor müavini Kamaləddin Qafarov isə bu etimaddan sui istifadə edərək mərkəzsdə biznes qurub. Etibardan sui-istifadə etmək isə heç bijr halda qəbul edilmir və bağışlanılmır.
Dərman mafiyasının baronu
“Lal deputat” kimi tanınan Kəmaləddin Qafarov nadir hallarda danışır, amma danışanda da “gül vurur”. O komitə iclaslarının birində deyib ki, “Azərbaycanda bəzi dərmanların qiymətləri Türkiyədən ucuzdur”. Kəmaləddin Qafarovun bu mövzunu dilə gəlməsi və belə bir iddia irəli sürməsi maraqlı olduğu qədər də gülüş doğurur. Təkcə ona görə yox ki, deputatın iddiası doğru deyil, həm də bu iddianı irəli sürən Kəmaləddin Qafarov ölkədə dərmanların qiymətinin baha olmasının əsas baiskarlarından biridir və belə bir şəxsin “Azərbaycanda dərmanlar ucuzdur” deməsi yumşaq desək vətəndaşları dolamaqdır. Onun parlament tribunasından öz biznesini legitimləşdirmək məqsədi daşıdığı aydın görünür.
Kəmaləddin Qafarovun əsas gəlir mənbəyi məhz dərman satışındandır. Bununla bağlı cumhuriyyet.az olaraq media üzərindən apardığımız araşdırmalarda ilginc məlimatlar yer alır. “AzəriMed” MMC şirkəti Kəmaləddin Qafarovun ən böyük dərman firmasıdır. Şirkət həm də tibbi ləvazimatların və avadanlıqların satışını həyata keçirir. O cümlədən, “Zəfəran” apteklər şəbəkəsi və “Zəfəran Hospital” da kağız üzərində Kəmaləddin Qafarovun yaxın qohumu Canliya Rəhim qızl Qafarovanınn adına olan şirkətə daxildir. “Kanon” apteklər şəbəkəsinin daxil olduğu “Kanon” MMC Qafarovun digər firmasıdır. Qanuni təmsilçisi Kəmaləddin Qafarovun əmisi oğlu Hüsaməddin Qafarovun olduğu “Shafran” MMC də dolayısı ilə deputata məxsusdur. Deputatın dərman biznesinə “Avestafarm” MMC, “Naturalist” firması da daxildir. “Naturalist” firmasının təsisçisi kağız üzərində deputatın qardaşı Cəlaləddin Qafarovdur (Paytaxtın ən dəbdəbəli və bahalı şadlıq evlərindən olan “Versal Palace”nin də qanuni təmsilçisi Cəlaləddin Qafarovdur ). Deputatın əczaçılıq biznesi ölkə sərhədlərinin hüdudlarını aşır. Gürcüstanda fəaliyyət göstərən, Tbilisi, İsani-Samqor rayonu, Qorqasali küçəsi 41 ünvanında hüquqi qeydiyyatda olan “Helios Pharma” LTD-nin də K.Qafarova məxsus olduğu deyilir. Şirkət Tamara Qamzaşvili adlı gürcü qadın tərəfindən idarə olunur. Eləcə də yunan Kiprində fəaliyyət göstərən “SALİDONT LTD”-nin də deputatın biznes imperiyasına bağlı olduğuna dair məlumatlar yayılıb.
Qafarov həm də Milli Onkologiya Mərkəzinin direktor müavini kimi dövlətin bura ayırdığı pulların böyük əksəriyyətini özünə məxsus “AzəriMed” şirkətinə transfer edir, dərmanlar ordan alınır. Yəni Onkologiya Mərkəzində dəhşətli bahalığın arxasında da məhz Kəmaləddin Qafarov dayanır.
Hədəfdə nazir kreslosu var?
Deyirlər ki, general olmaq istəməyən əsgər yaxşı əsgər deyil. Amma, lətifəsi bəzilərindən uzaq olsun, məscidin qapısı açıqdır, amma… İndi deputat Kəmaləddin Qafarovun səhiyyə naziri olmaq istəyi haqda xəbərlər bu iki məsəli yada salır. Kəmaləddin Qafarov kimilər necə nazir olmaq arzusuna düşə bilər axı..? Məlumat üçün cumhuriyyet.az diqqətinizə çatdırır ki, bu “lal deputat” Bakıda doğulub, paytaxtda məktəbi bitirib və sonda hansı yollasa Naxçıvanda universitetə daxil olub. Adamdan soruşarlar ki, Bakıda doğulan, burda böyüyən 17-18 yaşlı gənc necə oldu ki, gedib Naxçıvanda oxudu ?
Sizi inandırıram ki, bu adam bəlkə də universitetin qapısını tanımayıb. Bəs bu deputat Naxçıvanda hansı fakültəni bitirib, ixtisası nədir? Kəmaləddin Qafarovun rəsmi tərcümeyi-halında qeyd olunur ki, o, Naxçıvanda meyvə-tərəvəzçilik və üzümçülük fakültəsini bitirib. Yəni bu adam kələmdən, soğandan, badımcandan, xiyardan, yəni tərəvəzdən danışsa, başa düşmək olar. Bu adamın səhiyyəyə nə dəxli var, axı bu adam heç tibbi kolleci də bitirməyib…
Bəs heç bir tibb təhsili olmayan bu adam necə səhiyyə naziri olmaq eşqinə düşə bilər? Yaxşı deyək ki bu eşqə düşməyib, bəs bu adam necə strateji səhiyyə obyekti olan Milli Onkologiya mərkəzini idarə edir? Bu adam heç mal doxturu- baytar-veterinar da deyil, axı..
Bu adam hər yerdən ümidi kəsilən xərçəng xəstələrinin başına hansı zülmləri gətirmir? Kəmaləddin Qafarov bu əlacız xəstələrin hesabına milyonlar qazanır. Bəli, “universal” Kəmaləddin Qafarovun “VERSAL PALACE” MTK-sı Bakı şəhərində, Ağ Şəhərdə binalar tikir, bahalı mənzillər satır. Bir sözlə, səhiyyəmizə cəllad oliqarx göz dikib…
cumhuriyyet.az

Gün ərzində nə qədər su istifadə etdiyinizi heç düşünmüsünüz? Həm içmək, həm də suvarma üçün istifadə etdiyimiz suyun həcmini hesablasaq, gündə 1 nəfərin payına təxminən 165 litr su düşür. Hələ istifadə etdiyimizdən başqa, israf etdiyimiz suyun həcmini saymadıq.

Elə insanlar var ki, gün içində israf etdiyi suyun miqdarı istehlak etdiyi sudan daha çoxdur. Məhz bu cür insanlar üçün müxtəlif kampaniyalar, təbliğat proqramları keçirilir. Hətta demək olar, hər gün istifadə etdiyimiz ictimai yerlərdə, metro stansiyalarında böyük plakatlarda “Suya qənaət edək!” yazılarının önündən keçir, amma heç görmürük. Görsək də, fikir vermirik. Sadəcə, görüb, keçirik. Təəssüf ki, hələ də məsələnin ciddiyyətini tam olaraq anlamırıq. Evində suyun kəsilmə ehtimalını düşünüb ehtiyatda su yığıb saxlayanlar o ehtiyat bitdikdən sonra qonşulara müraciət etməyə başlayır. Amma dünyada su mənbələri tükənsə, nəinki insanlar, heç ölkələr də bir-birinə müraciət edə bilməyəcək. Onu da nəzərə alaq ki, Azərbaycanın su ehtiyatının 70 faizi xarici ölkələrin ərazisində formalaşır.

Türkiyə Prezidenti Rəcəb Tayyib Ərdoğan bir konfransda çıxışı zamanı deyib ki, dünyada su mənbələri sürətlə azalır: “Əlbəttə, əhalinin artması su qıtlığına təsir göstərir. Yağıntının miqdarında isə heç bir dəyişiklik olmur. İqlim dəyişikliyi ilə bağlı olaraq dünyada təbii fəlakətlərin də sayı artır. Fikir verirsinizsə, son vaxtlar yanğınların, zəlzələlərin, daşqınların sayı artıb”.

Cənab Ərdoğan deyir ki, hərəkətə keçməsək, daha ağır nəticələrlə üzləşə bilərik: “Sudan qənaətlə istifadə etmək lazımdır. Bu, seçim deyil, məcburiyyətdir”.

Suyun təminatı, istehlakı və s. məqsədlərlə Azərbaycanda müxtəlif tədbirlər görülür. Hətta 2020-ci il tarixli 2178 nömrəli “Su ehtiyatlarından səmərəli istifadənin təmin edilməsi ilə bağlı əlavə tədbirlər haqqında” Prezident İlham Əliyevin sərəncamı da var. Sərəncam ölkə ərazisində su çatışmazlığı və su anbarlarında yaranmış vəziyyəti nəzərə almaq, su ehtiyatlarını artırmaq, istehlakçıların içməli su və suvarma suyu ilə təchizatını yaxşılaşdırmaq, həmçinin ekosistemin inkişafı ilə uyğunluğunu təmin etmək məqsədi ilə imzalanıb. Eyni zamanda sərəncamda 10 ədəd yeni su anbarı, 20 ədəd suvarma kanalı, 1 ədəd korrektor dirəmə şəbəkəsi, 1 ədəd də hidroqovşağın yenidən qurulması nəzərdə tutulub.

Xəzər Universitetinin Ekoloji Tədqiqat Mərkəzinin direktoru, ekoloq, su mütəxəssisi Rövşən Abbasov Pressklub.az saytına açıqlamasında bildirib ki, son 10 ildə Azərbaycana xarici ölkələrdən gələn suyun miqdarı 2 dəfəyə yaxın azalıb.

“İnsanların artımı suya olan tələbatı da artırır. Bütün ölkələrdə suya tələbat artıb. Bunun səbəbi insan artımı ilə yanaşı, ərzaq istehsalının artması və insanların yaşayış tərzinin dəyişməsidir”.

Ekoloq deyir ki, hazırda dünyada urbanizasiya prosesi gedir. İnsanlar kənd yerlərini tərk edib, kütləvi halda şəhər yerlərinə köçürlər. Şəhərlərdə isə su istehlakı kənd yerlərinə nisbətən çox yüksək olur. İnsanların yaşayış səviyyəsi nə qədər yüksəlirsə, yaşayış mühiti dəyişirsə, onların suya tələbatı da artır.

Rövşən Abbasovun sözlərinə görə, Azərbaycan, eləcə də Türkiyə bu qəbildən olan ölkələrdir. Bizim su ehtiyatının 70 faizi xarici ölkələrin ərazisində formalaşır. Son 10 ildə Azərbaycana xarici ölkələrdən gələn suyun miqdarı 2 dəfəyə yaxın azalıb.

Abbasov deyir ki, su üstündə bir çox ölkələr arasında gərginlik var. Türkiyə, Gürcüstan, Ermənistan, İranda suya olan tələbat getdikcə artır. Bu isə əlbəttə, ölkələr arasında müəyyən gərginliklərə gətirib çıxarır. Məsələn, Türkiyə ilə Suriya və İraq, Tacikistanla Özbəkistan, Efiopiya ilə Misir arasında suya görə gərginlik var.

Müsahibimiz deyir ki, su getdikcə daha qiymətli resursa çevrilir və elə həddə çata bilər ki, su üstündə daha böyük münaqişələr yaransın: “Su qıtlığının qarşısını almaq üçün əsas yol suya qənaətdir. Quraqlığa uyğunlaşmış kənd təsərrüfatı qurulmalı, ölkələrarası müqavilələr imzalanmalıdır. Bizdə su itkisi çoxdur. Bunların qarşısı tədricən yox, tam formada alınmalıdır”.

Deməli, suvarma suyu ilə bağlı dünya həyəcan təbili çalır. Azərbaycanda da bu risk gözlənilir. Görəsən, içməli suyun vəziyyəti nə yerdədir?

Yeri gəlmişkən, içməli su təminatı ilə Azərsu Açıq Səhmdar Cəmiyyəti (ASC) məşğul olur.

Azərsu ASC-nin mətbuat katibi Anar Cəbrayıllı Pressklub.az-a açıqlamasında bildirdi ki, hazırda ölkənin şirin su ehtiyatlarının cəmi 2-2,2 faizi içməli suya yönəldilir: “Bu baxımdan, içməli su ilə bağlı sıxıntı yoxdur”.

Azərbaycanda suvarma suyuna isə yeni yaradılan Azərbaycan Dövlət Su Ehtiyatları Agentliyi nəzarət edir və suyun təminatı prosesini həyata keçirir. Azərsu ASC bildirdi ki, içməli su ilə bağlı problem yoxdur. Görəsən, suvarma su təminatında vəziyyət nə yerdədir?

Azərbaycan Dövlət Su Ehtiyatları Agentliyinin rəsmisi Riad Axundzadə mövzuya aydınlıq gətirib. O, Pressklub.az-a açıqlamasında deyib ki, nə su mənbələri, nə də su ehtiyatları tükənir.

“Qlobal iqlim dəyişikliklərinin təsirləri, bütün dünyada olduğu kimi, Azərbaycanda da müşahidə olunur. Azərbaycan bu baxımdan riskli ölkələr qrupunda yerləşir. Ölkənin su ehtiyatlarının təxminən 70 faizi ölkə xaricində formalaşır”.

Müsahibimiz deyir ki, Kür, Araz, Samux çayları başda olmaqla, ümumilikdə 21 transsərhəd çayları vasitəsilə ölkəmizə daxil olan su ehtiyatları yerüstü su ehtiyatlarımızın 70 faizini təşkil edir. Qalan su ehtiyatları ölkə sərhədləri daxilində yerli çaylardan formalaşır: “Amma transsərhəd çayların yolboyu keçdiyi bütün qonşu ölkələrdə də, Azərbaycanda olduğu kimi, qlobal iqlim dəyişikliklərinin təsirləri müşahidə olunur. Nəticədə buxarlanma, sudan istifadənin artımı və s. səbəblərdən bu çayların axını istiqamətində sonuncu ölkə – Azərbaycana daxil olan su ehtiyatlarında son illərdə müəyyən azalmalar müşahidə olunur”.

Onun sözlərinə görə, təxminən son 30 ildir ki, Qarabağ və Şərqi Zəngəzur vilayətlərinin su potensialından istifadə edə bilmirdik. Yaxın gələcəkdə isə ondan yararlana biləcəyik: “Qarabağın ümumi su ehtiyatları 2.1 milyard kub metr həcmində dəyərləndirilir. Bu ehtiyatlardan səmərəli istifadənin təmin edilməsi məqsədilə ümumilikdə 9 ədəd su anbarı və onlardan qidalanan kanalların əsaslı şəkildə yenidən qurulması nəzərdə tutulmuşdur. Artıq bu istiqamətdə 5 ədəd – Xaçınçay, Suqovuşan, Köndələnçay-1, Köndələnçay-2 və Aşağı Köndələnçay su anbarlarının yenidən qurulması işlərinin son mərhələsindəyik. Anbarlar təmir ediləndən sonra bu suların anbarlarda toplanması və qənaətlə istifadə edilməsi əsas hədəflərimizdən biridir”.

Axundzadə deyir ki, su təminatında problem yaranması proqnozlaşdırılmır. Çünki Dövlət Su Komissiyası və Azərbaycan Dövlət Su Ehtiyatları Agentliyi bu istiqamətdə anbarların iş rejiminin nizamlanması, su ehtiyatlarından səmərəli və qənaətlə istifadə istiqamətində bir sıra tədbirlər həyata keçirir. Bununla yanaşı, iqlim dəyişikliklərinin təsirlərinin azaldılması, o cümlədən su ehtiyatlarından səmərəli istifadə məqsədilə önümüzdəki illərdə 10 ədəd yeni su anbarının tikilməsi, o cümlədən 18 ədəd suvarma kanalı, 1 ədəd hidroqovşaq və 1 ədəd kollektor-drenaj şəbəkəsinin yenidən qurulması nəzərdə tutulmuşdur.

Su hər bir xalqın əvəzedilməz sərvətidir. Təsadüfi deyil ki, 1993-cü ildən bu günədək hər il martın 22-si Birləşmiş Millətlər Təşkilatının qərarına əsasən, Ümumdünya Su Günü kimi qeyd edilir.

Araşdırmalara görə, dünyada orta hesabla 1,6 milyard insan təhlükəsiz və təmiz su ehtiyatlarına çıxışda problem yaşayır. Təxminən 4 milyard insan ildə ən azı bir ay su qıtlığından əziyyət çəkir.

Birləşmiş Millətlər Təşkilatının Dayanıqlı İnkişaf Məqsədləri çərçivəsində 2030-cu ilə qədər hamı üçün su çağırışı ediləcək. Məlumatlar göstərir ki, yer səthində su qıtlığı artmaqdadır və 2050-ci ilə qədər dünya əhalisinin yarıdan çoxu su qıtlığı yüksək olan regionlarda yaşayacaq.

Bu qıtlığın qarşısını almaq üçün hər kəs səfərbər olmalıdır. Lazımsız yerə su israfına yol verməməliyik. (Pressklub)

Bu ilin ilk günlərində İrəvanda neonasist Qaregin Njdenin ideyalarının "daşıyıcısı" olanların yürüşü keçirildi. Onlar İrəvanın mərkəzi küçələri il yürüş edərək, Respublika Meydanına, oradan da Qaregin Njdenin abidəsinin qarşısına yollanıblar.

Qaregin Njde irqçilik, nasizm, ksenofobiya, islamofobiya və türk düşmənçiliyi kimi rəzil ideologiyalarını simbiozu olan "sexakron" adlı "əsl erməni ideologiyası" yaratdığını demiş, "Yaxşı türk ölü türkdür!" şüarının "hər erməninin yaşam yolu olmasının gərəkdiyini" yazmışdı. Hitler Almaniyası ilə sıx əməkdaşlış etmiş Njde 2-ci Dünya Müharibəsindən sonra həbs olunmuş, kamerada ölmüşdü.

Njde azərbaycanlılara da nifrət edirdi və 1918-1920-ci illərdə minlərlə soydaşımızın qətlində bilavasitə iştirak etmişdi.

İrəvanın mərkəzində neonasist simvolikası, şüarları və çağırışları, njdeizm ideologiyasının təbliği Ermənistanın hakimiyyət dairələrini, deyəsən, narahat etmir.

İrəvanda yəhudi sinaqoquna hücum və ona od vurulması da qatı antisemitizm, yəhudi düşmənçiliyi təzahürü olsa da, baş nazir Nikol Paşinyan bununla bağlı açıqlama vermədi. Hakimiyyətin nəzarətindəki mass-medias isə baş verənləri "Ermənistandan kənar qüvvələrin ölkədəki stabilliyi pozmaq və cəmiyyətdə xaos yaratmaq cəhdləri" kimi dəyərləndirdilər.

Bir qədər sonra isə Paşinyanın funksionerləri sadalanan hadisələrin "bir qrup marginallaşmış insanın qanunazidd əməlləri" olduğunu söylədilər.

İstənilən halda rəsmi İrəvan çox pis vəziyyətə düşüb.

Hakimiyyətin bəhs etdiyi "kənar qüvvələr" versiyasına nəzər salsaq və bir anlıq fərz etsək ki, deyilənlər gerçəkdir - onda Ermənistanın kənardan idarə olunan ölkə olduğu aşkarlanır. Hansısa mifik "kənar qüvvələr" paytaxt İrəvanın mərkəzində neonasistləri küçələrə çıxarırsa, sinaqoqda yanğın törədirsə, irqi, etnik və dini zəmində təqibləri normal yaşam tərzi sayanların "əsl vətənpərvər" olduqlarını iddia edənlərin populyarlığını təmin edirsə - deməli, Ermənistanda hakimiyyətin ali qanunverici, icra və məhkəmə qolları, ümumiyyətlə, fəaliyyət göstərmir.

İkinci versiya realdırsa, onda Ermənistanda hakimiyyət o qədər zəifdir ki, populyarlıq qazanaraq, kütlə içində özünə yer etməyi bacaran istənilən marginal qrup və ya hərəkat iqtidara yiyələnə bilər.

Marginalların hakimiyyəti ələ keçirərək, ölkəni idarə etməyə başlaması ilə bağlı bəşər tarixində presedentlər az deyil.

Məntiqlə, Ermənistanın hakimiyyət dairələri adekvat davranaraq, belə aksiyaların qarşısını almalı, ölkənin mövcud qanunvericiliyi çərçivəsində zəruri addımlar atmalı idi. Fəqət Nikol Paşinyan və onun komandası Ermənistanın müstəqilliyi, suverenliyi, azadlığından çox danışsalar da, legitim hakimiyyət olduqlarını az qala hər gün vurğulasalar da, reallıq fərqlidir.

Ermənistan cəmiyyətindəki anarxiya, siyasi müstəvidəki xaos və kənar qüvvələrin daxili situasiyaya müdaxilələri varsa, sadalanan nüanslara qarşı nə isə edilməlidir.

Edilmir, çünki Ermənistan müstəqil, suveren və azad dövlət yox, hamiləri ilə havadarlarının oyuncağına çevrilib.

Ermənistanda açıq cəmiyyətin mövcudluğunu Qərb dəyərlərinin aliliiyini təmin etməyə, Avropa İttifaqı və NATO ilə əlaqələri genişləndirməyə, insan haqlarının və vətəndaş mənafeyinin üst tutulmasını təmin edən sistemi formalaşdırmağa, daxili siyasi müstəvidə fikir müxtəlifliyinin və plüralizmin bərqərarına can atan siyasi isteblişmentin olduğunu vurğulayan Nikol Paşinyan, yumşaq desək, düz demir.

Qonşu ölkədə mövcud hakimiyyətə qarşı çıxan siyasi qüvvələrə qarşı təqiblərə və repressiyalara əl atılır, müxalifət liderlərinin fəaliyyətləri gün keçdikcə daha çox məhdudiyyətlə üzləşir, həbslər dalğası artır. Rəsmi İrəvan siyasi opponentlərinə qarşı ən ağır cəza mexanizmlərini tətbiq edir və bütün bunlar Qərbin laqeydliyi ilə müşahidə olunur.

ABŞ, Avropa İttifaqı və Fransa bütün bunları Ermənistanın "tam suveren dövlət olmaması bağlı yaşadığı çətinliklər"lə əlaqələndirir. Yəni ermənilərə açıq şəkildə bildirilir ki, onlar Rusiya ilə münasibətləri kəsərək, Ukrayna və ya Moldovanın strategiyasından "yararlanmasalar", vəziyyət dəyişməyəcək.

Fransanın Cənubi Qafqazdakı satellitinə çevrilən, ABŞ və Avropa İttifaqının müxtəlif güc mərkəzlərindən alınan təlimatlar əsasında davranan, İran və Rusiya ilə əlaqələrini minimallaşdırmaq istəməyən, zidd və əks düşərgələrin hər birindən mənfəət əldə etməyə can atan Ermənistan bütün bunlarla yanaşı, ordusunun qalıqlarını bərpa edərək, güclü silahlı qüvvələr yaratmaq istəyir. Ermənistan hazırda sürətlə silahlanır və onu militarlaşma istəkləri rəsmi Paris tərəfindən nəinki dəstəklənir, hətta təqdir olunur və stimullaşdırılır.

Təbii ki, belə vəziyyətdə Ermənistan bölgədə rasional siyasət yürüdən, diplomatiyasında praqmatizmə üstünlük verən ölkə qisminldə əsla qəbul oluna bilməz. Səbəb sadədir: Ermənistanın hakimiyyət dairələrinin yürütdüyü siyasət və əməlləri onların bəyanatları ilə kəskin ziddiyyət təşkil edir.

Ermənilər hələ də adi suala cavab tapa bilmirlər: Ermənistan suveren dövlətdir, ya yox?

Paşinyan hakimiyyəti Azərbaycanı könüllü tərk edərək Ermənisana köç etmiş qarabağlı ermənilərdən də strateji planlarında kart-blanş qismində istifadə etmək niyyətindədir.

Halbuki həmin ermənilərin böyük qisminin Azərbaycandan getmələrinin 2 vəsiləsi vardı: siyasi-ideoloji və praktiki.

Siyasi-ideoloji səbəbi hələ 2003-cü ildə Ermənistanın həmin dönəmdəki prezidenti Robert Köçəryan Avropa Şurasında belə açıqlamışdı: “Ermənilərlə azərbaycanlılar genetik baxımdan birlikdə yaşaya bilməzlər, uyğun deyilik”.

Halbuki multikulturalizmin və tolerantlığın dövlət ideologiyasının tərkib hissəsi olduğu, onlarla xalqın və etnosun nümayəndələrinin birgə yaşadığı Azərbaycan rəhbərliyi qarabağlı ermənilərə daim evlərində qalmağı, yaşamağa davam etməyi təklif edib, indi də edir.

Bunun üçün görülməsi gərəkən işlər azdır: Azərbaycan vətəndaşlığı qəbul olunmalı, rəsmi qeydiyyata düşülməli və ölkəmizin Konstitusiyası ilə mövcud qanunvericiliyinin tələblərinə əməl olunmalıdır.

Rəsmi Bakı ilə İrəvanın problemə yanaşmasındakı köklü fərq budur.

Praktiki səbəb isə Xankəndindəki sabiq xunta ilə bağlıdır. Bu terrorçu rejimin rəhbərliyi və funksionerləri Azərbaycan Ordusunun lokal antiterror tədbirlərindən sonra kapitulyasiya etdilər, “hakimiyyət strukturları” buraxıldı və onlar qaçdılar.

Qarabağlı ermənilər isə onillərlə davam edən separatizmdən, xunta tərəfindən idarə olunmadan sonra qəflətən rəhbərliksiz qaldılar.

Onlar Rusiya Sülhməramlı Kontingentinin (RSK) lokal antiterror tədbirlərinə mane olacağını düşünürdülər, amma ordumuz əməliyyatlarını uğurla başa vurdu.

Təsadüfi deyil ki, Xankəndindəki artıq sabiq separatçı xuntanın nümayəndələri Yevlaxda rəsmi Bakının təmsilçiləri ilə ilk görüşdə əsas istək qismində benzin arzulamışdılar.

Onlar istədikləri həcmdə benzini alan kimi Ermənistana qaçdılar və qarabağlı ermənilərin separatixzm konstruksiyaları çökdü.

“Başsız” qalan qarabağlı ermənilər panikaya qapıldılari və beləcə, onların Azərbaycandan Ermənistana kütləvi köçü oldu.

Əsas səbəb isə ermənilərin hələ də nə baş verdiyini anlamaq istəməmələridir. 2020-ci ildə 2-ci Qarabağ Müharibəsi Ermənistanın tam kapitulyası ilə başa çatandan sonra erməniləri məğlubiyyətin səbəblərini soyuqqanlı şəkildə araşdırıb təhlil aparmadılar.

Ermənistan və qarabağlı erməniləri problemin həllini istəmir, nizamlanma yolu aramırdılar. Ötən ilin sentyabrın 19-dək onlar nəyəsə ümid edir, Xankəndindəki separatçı xuntanın mövcudluğuna təhlükə görmürdülər.

Lokal antiterror tədbirləri onların separatçı ideologiyasını darmadağın etdi.

Sülh sazişinin imzalanması istiqamətində real, konstruktiv addımlar atmaq növbəsit Ermənistandadır.

Nikol Paşinyan indi nəyi və necə bəhanə edəcək?(TREND)

Penitensiar xidmətinin kadrlar şöbəsinin rəisi Əflatun Məmmədovun həbs oluna, Mayil Məmmədov isə vəzifəsini itirə bilər…
Prezident İlham Əliyevin sərəncamı ilə PrnitensiarXidmətin rəisi vəzifəsinə təyin olunan Mirsaleh Seyidov bu sistemdə uzun illərdən bəri ənənə halını alan rüşvət və digər neqativ hallarla mübarizəyə başlayıb.
Qeyd edək ki, ötən müddət ərzində istintaq təcridxanalarında və cəzaçəkmə müəssisələrində saxlanılan məhbuslarla onların yaxınlarının görüşü zamanı tələb olunan rüşvət ləğv edildi.
Bundan başqa məhkumların qida təminatında da müsbət irəlləyişlərin olduğu deyilir.
Belə ki, bu addım indiyədək normal qidadan mərhum olan minlərlə imkansız məhkumlar üçün sevindirici olub.
Bundan əvvəl Penitensiar Xidmətin yeni rəisi vəxtından əvvəl cəzadan azadetmə məsələlərini də prioritet seçib.
Əvvəllər bu hal üçün məhkumlardan, onların yaxınlarından rüşvət müqabilində məhkəmə üçün müsbət rəy yazılırdısa, indi bu qanunsuz tələb aradan götürülüb.
Ancaq indi yeni rəisi tapşırığına əsasən müəssisə rəhbərliyi qanunla müddəti başa vuran bütün məhkumların sənədlərini zamanında yerli məhkəmələrə təqdim edir.
RealMedia.az xəbər verir ki, Gununsesi.info-nun araşdırması zamanı Penitiensiar Xidmət rəisinin bu sahədə ciddi dönüşə səbəb olacaq qərarları bəzi müəssisə rəislərinin heç də ürəyincə deyil.
Belələrindən birinin Şəki Penitensiar Müəssisəsinin rəisi Fərhad Hüseynov olduğu bildirilir. Məlumat üçün qeyd edək ki, Avropa standartlarına uyğun qurulan mu müəssisə həm təcridxana, həm ümumi və ciddi rejimli cəzaçəkmə müəssisələrindən ibarətdir.
Bildirilir ki, Şəki Penitensiar müəssisəsində məhkumlara qarşı qanunsuz davranış, onların görüşə gələn yaxınlarından pul tələb edilməsi kimi “köhnə ənənələr” hələ də müəssisədə davam edir.
İddialar görə, müəssisəyə ilk daxil olan məhkum 14 günlük karatın rejimindən vaxtından əvvəl “baraklar” köçürülməsi üçün müəssisə rəisinə500 manat pul verməlidir. Bundan başqa təcridxanada iki nəfərlik kamerada qalmaq üçün 3000 manat pul verilməlidir, istənilən vaxt yuyunmaq üçün pullu hamam 10 manat, istənilən vaxt telefonla danışmaq dəqiqəsi 5 manat, saç saxlamaq üçün ayda 100 manatŞ tibb məntəqəsində qalmaq üçün ayda 2000 manat, karsa düşməmək üçün 500 manat, vaxtından əvvəl üilə üzvlərinlə görüşmək 300 manat və sairə pul ödənilməlidir.
Rəisin bu “daskı”sı məhkumların haqlı narazılığına səbəb olub. Onlar bu üzdən də mətbuat vasitəsilə Mirsaleh Seyidovun Şəki Penitensiar Müəssisəsinə xüsusi diqqət yetirməsini xahiş edirlər.
Onu da qeyd edək ki, yaxın vaxtlarda Penitensiar Xidmətdə kadr islahatlarına başlanılacaq. Baş vermiş islahatlar fonunda xeyli yüksək vəzifəli xidmət və müəssisə əməkdaşları vəzifələrini itirəcəklər. İşini itirəcək şəxslər arasında Xidmətin kadrlar şöbəsinin rəisi Əflətub Məmmədov və Penitensiar Xidmətin Müalicə Müəssisəsinin rəisi Mayıl Məmmədovun da adları yer alıb.
Qısaca olaraq qeyd edək ki, Əflatun Məmmədovun adı Penitensiar Xidmətdə işə düzəlmək istəyən bəzi şəxslərdən ümumilikdə 250 min manatdan artıq rüşvət almaqda keçirdi. Lakin həmin vaxt Ceyhun Həsənov Əflatun Məmmədovun məsuliyyətə cəlb edilməsinə bütün səylə imşan vermədi.
Mayıl Məmmədova gəlincə isə, onun da adı Cehyun Həsənovun dövründə rüşvət qalmaqalında çəkilməklə yanaşı, həm də müəssisə daxili gizli narkotik vasitələrin ticarətini təşkil etməkdə keçirdi. Bununla bağlı dövrü mətbuatda kifayət qədər informasiyalar dərc olunub.
Yazıda adı keçən tərəflərin mövqeyini dinləməyə və dərc etməyə hazırıq.
P.s. Yazı ayrı-ayrı media resurslarında yayımlanan məqalələrə istinadla hazırlanıb.
MƏNBƏ: RealMedia.az

Azərbaycanın Birinci vitse-prezidenti Mehriban Əliyeva 31 Dekabr - Dünya Azərbaycanlılarının Həmrəyliyi Günü Yeni illə bağlı paylaşım edib.

Mehriban Əliyeva bunu sosial media hesabında yazıb.

“Əziz bacılar və qardaşlar!

Sizi Dünya Azərbaycanlılarının Həmrəyliyi Günü və qarşıdan gələn Yeni il münasibətilə səmimi-qəlbdən təbrik edirəm!
Qoy, dünya azərbaycanlılarını hər zaman Vətənimizə olan ən nurlu, ən xoş hisslər, ölkəmizin uğurları, nailiyyətləri və qələbələri ilə qürur hissi birləşdirsin. Uca Tanrıdan hər bir vətəndaşımıza möhkəm cansağlığı, uzun ömür və xoşbəxtlik, Vətənimizə isə sülh, tərəqqi və əmin-amanlıq diləyirəm.

Dərin hörmət və sevgilərlə,

Sizin MEHRİBAN”, - deyə paylaşımda qeyd edib.