"Türkiyənin Fransaya, Erdoğanın Makrona etirazı, arqumentli tənqidi anlaşılandı, lakin Fransa mallarını boykota çağırmaq həm məntiqsizlikdir, həm də ziyanlı".
"MediaPost" xəbər verir ki, bunu iqtisadçı ekspert Natiq Cəfərli deyib. Onun sözlərinə görə, son iki ildə Türkiyə Fransaya aldığından daha çox mal satır:
"2019-cu ildə Türkiyə Fransaya 7,9 mlrd. dollarlıq mal satıb, Fransadan isə 6,8 mlrd. dollarlıq mal alıb - Türkiyə bu ticarətdə 1,1 mlrd. dollar qazanıb, bu isə Türkiyədə yüzminlərlə iş yeri deməkdir".
Ekspertin sözlərinə görə, bu ilin ilk 8 ayında Türkiyə Fransaya 4,2 mlrd. dollarlıq mal satıb, 3,9 mlrd. dollarlıq isə mal alıb - müsbət saldo yenə Türkiyənin xeyrinədir, 300 mln. dollar qazanc var: "Qarşılıqlı boykot kimə xeyir verə bilər - təbii ki, Fransaya, ona görə də haqlı mövqelərin hüquqi və siyasi müdafiəsi daha məntiqli və doğrudur, populizmə yuvarlanmaq olmaz".
"Boykota bizdə də çağırışlar var - bunun da məntiqi və məzmunu yoxdur, Fransa üçün bizim - Azərbaycanın aldığı mal ixracatının 0,01%-i də deyil. Biz isə onlara bu ilin ilk 9 ayında 56 mln. dollarlıq mal satmışıq - bu isə bizim üçün heç də az deyil. Ən çox aldığımız mallardan biri avtomobillərdir - o da Fransa malı olsa da, Türkiyədə istehsal olunur. Bir sözlə, Türkiyə bizim üçün arxadı, dayaqdı, qardaşdı, özəl ölkədi, ikinci vətəndi, amma həmişə qardaş-qardaşa, dost-dosta sözün düzünü deməli, nəyin səhv, nəyin doğru olduğu haqqında açıq danışmalıdır".
Zamantv.az