“3 aydan sonra əmanətlərin tam siğortalanmasi ləğv ediləcək. Parlamentin buraxılması fonunda müddətin uzadılma ehtimalı aşağıdır”.
Bizimyol.info xəbər verir ki, bu barədə bank məsələləri üzrə ekspert Əkrəm Həsənov bildirib. Onun sözlərinə görə, Azərbaycanda 4 mart 2016-cı il tarixdən 3 il müddətinə əmanətlərin tam sığortalanması sistemi mövcuddur: “Ötən il bu sistemin müddəti 1 il də uzadıldı, yəni 2020-cilin 4 martınadək. Bu sistemə əsasən fiziki şəxslərin əmanətləri tam məbləğdə sığortalıdır, bu şərtlə ki, milli valyutadakı əmanətin illik faiz dərəcəsi 10 faizdən, xarici valyutadakı əmanətin illik faiz dərəcəsi isə 2,5 faizdən çox deyil.
4 mart 2020-ci il tarixdən sonra əmanətlərin sığortalanması necə həyata keçiriləcək? “Əmanətlərin tam sığortalanması haqqında” Qanunun 5.2-ci maddəsinə əsasən 4 mart 2020-cu il tarixdən sonra bağlanmış hər bir bankda sığortalanmış əmanət yalnız 30000 manatdan çox olmamaq şərtilə kompensasiya ediləcək”.
Ekspert qanunun müddətinin yenə uzadılacağına ehtimal aşağı olduğunu bildirib: “Çünki parlament buraxılmaq üzrədir. Milli Məclisin yeni tərkibi yəqin ki, 4 martdan sonra ilk iclasına toplaşacaq. Bəs bu vəziyyətdə işdən hali olan əmanətçilər nə edə bilər?
1) Bankda yalnız 30000 manat həddində əmanət saxlaya bilərlər. Yəni artıq məbləği çıxara bilərlər. Bu məntiqlə əmanətlərinin məbləğini bölüşdürə də bilərlər. Yəni elə edə bilərlər ki, bir nəfərin adına bir bankda 30000 manatdan çox pul qalmasın. Bunun üçün ya əmanəti bir neçə bank arasında bölə (hər bankda maksimum 30000 manat), ya da bir bankda qohumları arasında bölə (hər qohumun adına maksimum 30000 manat) bilərlər.
2) Əmanətlərini (məbləğindən asılı olmayaraq) daha etibarlı, yəni zənnlərinə görə bağlanma ehtimalı olmayan banklarda saxlaya bilərlər. Amma həmin banklarda əmanətlər üzrə faiz dərəcələri nisbətən aşağıdır”.
Zamantv.az